_1704867435.jpeg)
मोरङः साइकलमा स्कुल जादै गरेकी एक बालिकाको ट्याक्टरको ठक्करबाट विराटनगरमा मृत्यु भएको छ ।
पूर्वबाट पश्चिमतर्फ गइरहेको को १ ७०३९ नम्बरको ट्र्याक्टरको ठक्करबाट विराटनगर ६ का गंगा श्रेष्ठकी ६ वर्षीया बालिका त्रिसा श्रेष्ठको मृत्यु भएको मोरङ प्रहरीले जनाएको छ । गम्भीर घाइते बालिकालाई तत्काल उपचारको लागि न्युरो अस्पतालमा लगिएको थियो । उनको उपचारको क्रममा दिउँसो १ बजेतिर मृत्यु भएको हो ।
मेरीगोल्ड स्कुलमा कक्षा १ मा अध्ययनरत बालिकालाई बिहान करिब १० बजेतिर विराटनगर ६ मा ठक्कर दिएको हो । बालिका साइकलमा सवार थिइन् । साईकल १५ वर्षीया रेणुका श्रेष्ठले चलाएकी थिइन् । उनी दिदी नाता पर्छिन् । उनी भने सामान्य घाइते भएको र सकुशल रहेको प्रहरी प्रवक्ता एवं डिएसपी मानबहादुर राईले जनकारी दिए । उनले भने,'गम्भीर घाइते बालिकाको मृत्यु भएको छ, साइकल चलाउने बालिका सामान्य घाइते थिइन्, सकुशल छिन् ।' प्रहरीले ट्र्याक्टरसहित चालक सुनसरीको बर्जु गाउँपालिका–२ का २५ वर्षीय सञ्जय ऋषिदेवलाई पक्राउ गरिसकेको छ ।
धनकुटामा पनि ट्रलीले किचेर बालिकाको मृत्यु
आज नै धनकुटा बजारमा पनि ट्याक्टरको ट्रलीले किचेर एक बालिकाको मृत्यु भएको छ । विद्यालय जाँदै गरेकी धनकुटा ८ पेलेकपाङ्गकी १५ वर्षीया रेबिका आठपहरिया राईको ट्याक्टरको ट्रलीले किचेर घटनास्थलमै मृत्यु भएको प्रहरीले जनाएको छ ।
धनकुटा ७ स्थित सिरवानीमा प्रदेश १–०२–००३ त ६१२ नम्बरको ट्याक्टरको ट्रलीले विहान ९ः३० बजे किचेको हो । त्रिवेणी माविमा कक्षा–९ मा अध्ययनरत उनलाई निर्माणाधीन घरमा बालुवा अनलोड गर्ने क्रममा ट्याक्टरको हाइड्रोलिक ट्रली पल्टिएर किचेको प्रहरीको भनाई छ ।
