भोजपुरका कोरोना संक्रमित युवा ८ दिनसम्म धरान, इटहरी, झुम्का, चतरा घुमेको खुल्यो धरानमा टेम्पोमा श्रीमतिसँग घुमेका थिए

  • प्रकाशित: बैशाख ११, २०७७ / 25,046 पटक पढिएको
  • क्लिक धरान
alt

धरान:कोरोना संक्रमित भोजपुरको हतुवागढीका युवा ८ दिनसम्म धरान, इटहरी, चतरा, झुम्कालगायत सुनसरीको विभिन्न शहर घुमेको खुलेको छ ।

प्रहरी स्रोतका अनुसार ती ब्यक्ति फागुन ३० गते साउदीबाट काठमाण्डौं उत्रिएका थिए । सोही दिन उनी नाइट बस चढेर सुनसरीको झुम्का आए । त्यहाँबाट उनी चतरा पुगे । चतरामा उनको श्रीमति थिइन् । त्यसपछि श्रीमतिसँग सार्वजनिक बस चढेर चतरालाइन आएको पनि खुलेको छ । त्यहाँबाट उनीहरु टेम्पोमा चढेर धरान घुमेको खुलेको छ । ‘श्रीमतिसँग धरानमा टेम्पोमा घुमेको थिए,’ती युवाले भोजपुर प्रहरीलाई भनेको छ ।

ती युवा धरान मात्र घुमेनन्, उनीहरु सार्वजनिक बस चढेर इटहरी पनि पुगे । त्यसपछि ८ दिनसम्म धरान, इटहरी, झुम्का, चतरा आउजाउ गरिरहेका थिए । ‘उसको भनाईको आधारमा ८ दिनसम्म धरान, इटहरी, झुम्का, चतरा घुमेको देखिन्छ,’प्रहरी स्रोतले भन्यो । उनी ९ गते मात्र ससुराली उदयपुर गएको देखिन्छ । भोजपुरको हतुवागढीका ती युवाको ससुराली उदयपुरको मैनामनी हो । त्यहाँबाट उनी मोटरसाइकलमा हतुवा पुगेका थिए । गाउँमा पुगेर उनी भलिवल खेल्न, बजार डुल्न गएको पनि खुलेको छ ।

उनको २ दिनअघि आरडिटी परीक्षण गर्दा पोजेटिभ देखिएको थियो । त्यसपछि उनको पिसिआर परीक्षण गर्न स्वाब धरानस्थित वीपी कोइराला स्वास्थ्य विज्ञान प्रतिष्ठान ल्याइएको थियो । उनको पिसिआर रिपोर्ट आज पोजेटिभ आएको छ ।

अध्यक्ष: सबिता राई || प्रधान सम्पादक: आर.के.राई || प्रबन्ध निर्देशक: सुनिता केसी राई || फाेटाे सम्पादक: विकास चाम्लिङ

Click Dharan Media (P) Ltd. || फोन: ९८१४३२३६४६ || इमेल: [email protected]

कम्पनी दर्ता नं. २३६५०० || स्थायी लेखा नं.: N/A || प्रेस काउन्सिल नेपाल: N/A || सुचना तथा प्रसारण विभाग: N/A

प्रतिलिपि अधिकार © 2020 / 2020 - क्लिक धरान - सर्वाधिकार सुरक्षित