_1704867435.jpeg)
विराटनगर: आज बिहिबार दिउँसो मोरङ र पाँचथरका दुई छुट्टाछुट्टै स्थानमा भएको सवारी दुर्घटनामा २ जनाको ज्यान गएको छ ।
दिउँसो सवा १२ बजे कटहरी ४ रंगेली सडक खण्डमा को २ त ६१२७ नम्बरको ट्रयाक्टरले को ३ प ३३०९ नम्बरको मोटरसाईकललार्इ ठक्कर दिएको थियो । उक्त दुर्घटनामा घाईते भएका मोटरसाईकल चालक धनपालथान ७ का ६० बर्षीय मुस्तफी मियाँको न्युरो अस्पताल बिराटनगरमा उपचारको क्रममा पौने १ बजे मृत्यु भएको जिल्ला प्रहरी कार्यालय मोरङले जनाएको छ । प्रहरीले ठक्कर दिने ट्रयाक्टर र चालक नियन्त्रणमा रहेको उक्त कार्यालयले जनाएको छ ।
यसैगरी, पाँचथरको कुम्मायक ४ वानथाकस्थित मध्यपहाडी लोकमार्गको ट्रयाक खन्ने क्रममा स्काईभेटर दुर्घटनामा एक जनाको मृत्यु भएको छ । मृत्यु हुनेमा दोलाखा तामाकोशी ३ पुरानोगाँउका २८ बर्षीय पवन महत रहेका छन् । दिउँसो सवा १२ बजे ट्रयाक खन्ने क्रममा ना १ क ८३२१ नम्वरको स्काईभेटर अचानक चिप्लिएर ५०० मिटर तल खसेको थियो । उक्त दुर्घटना हुँदा चालक महतको घटनास्थलमानै मृत्यु भएको जिल्ला प्रहरी कार्यालय पाँचथरले जनाएको छ ।
