झापा: झापाको मेचीनगर नगरपालिका ६ बद्री टोलबाट ब्राउन सुगरसहित २ जनालाई पक्राउ गरेको छ । 

पक्राउ पर्नेमा स्थानीय २६ बर्षीय सुमन दनुवार र दमक ५ की २१ बर्षीया समिता राई रहेका छन् । शुक्रबार दिउँसो १ बजे ब्राउन सुगर खरिद विक्री बितरण गरिरहेको गोप्य सुचना प्रहरीले गरेको थियो । सोही आधारमा सीमा प्रहरी चौकी नकलबन्दा र लागूऔषध नियन्त्रण व्युरो काँकरभिट्टाबाट खटिएको संयुक्त प्रहरी टोली दुवैलाई पक्राउ गरेको हो ।

उनीहरुको साथबाट ब्राउन सुगर ५ ग्राम पनि वरामद भएको प्रहरीले जनाएको छ । दुवैलाई ईलाका प्रहरी कार्यालय काकडभिट्टामा ल्याई थप अनुसन्धान भईरहेको उक्त कार्यालयले जनाएको छ।

यसैगरि, उदयपुरको त्रियुगा नगरपालिका ७ धरमपुरबाट लागूऔषधसहित प्रहरीले २ जनलाई पक्राउ गरेको छ । पक्राउ पर्नेमा स्थानीय १९ बर्षीय अमिर खड्का र २० बर्षीय सुरज कार्की रहेका छन् । 

शुक्रबार दिउँसो २ बजे बिशेष सुचनाको आधारमा जिल्ला प्रहरी कार्यालय उदयपुरको टोलीले उनीहरुलाई पक्राउ गरेको हो । दुवैको साथबाट लागूऔषध फेनारगन १२ एम्पुल, नोफिन १२ एम्पुल र डाइजिलाब १२ एम्पुल वरामद भएको प्रहरीको भनाई छ ।