_1704867435.jpeg)
उदयपुर: उदयपुर जिल्लाको त्रियुगा नगरपालिका ३ मोतिगढाबाट एक व्यक्ति अटोमेटिक पेस्तोलसहित पक्राउ परेका छन् । पक्राउ पर्नेमा ५० बर्षीय पर्शुराम चौधरी रहेका छन् ।
मोतिगढास्थित घरमा बस्दै आएका चौधरीले हतियार लुकाई राखेको बिशेष सुचनाको आधारमा प्रहरीले हिजो (बुधबार) राती छापा मारेको थियो । जिल्ला प्रहरी कार्यालय उदयपुरको टोलीले उनको कोठाबाट मेड इन युएसए लेखेको अटोमेटिक पेस्तोल वरामद गरेको थियो । पेस्तोलसँगै ५ राउण्ड गोल पनि फेला परेको प्रहरीले जनाएको छ ।
प्रहरीले थप अनुसन्धान गर्ने क्रममा उनको कोठाबाट अखिल नेपाल ट्रेड युनियन महासंघ लेखिएको सहयोग रसिद ८ ठेली, नेकपा माओबादी केन्द्र लेखिएको सदस्यता पत्र ३ थान, अखिल नेपाल निर्माण मजदुर संघ लेखिएको सदस्यता पत्र ८५ थानसमेत फेला परेको जानकारी दिएको छ । पक्राउ परेका चौधरीबारे थप अनुसन्धान तथा कानुनी कारबाही अघि बढाइएको जिल्ला प्रहरी कार्यालय उदयपुरले जनाएको छ ।
