मोरङ: बेलबारी ९ माछा हटियाबाट प्रहरीले लागुऔषधसहित ४ जनालाई पक्राउ गरेको छ ।

ईलाका प्रहरी कार्यालय बेलबारीबाट खटिएको प्रहरी टोलीले मोटरसाइकलमा सवार युवाहरुलाई हिजो करिब पौने ४ बजे लागुऔषधसहित समातेको हो । पक्राउ पर्नेहरुमा बेलबारी १ का २५ बर्षीय रिकल कोइराला, २४ बर्षीय केशव गुरुङ, २७ बर्षीय विशाल गुरुङ र ३५ बर्षीय सुरज गुरुङ रहेका छन् । उनीहरु को १७ प ४७२ र को ३० प ५६१ नम्बरको मोटरसाइकलमा सवार थिए । 

उनीहरुको साथबाट प्लाष्टिक भित्र सेतो टेपले बेरेर राखेको डाइजिल्याब १७ एम्पुल, फेनरगन १७ एम्पुल, एभिल १७ एम्पुल र लुपिजेसिक १७ एम्पुल गरि ६८ एम्पुल लागुऔषध प्रहरीले फेला पारेको थियो । पक्राउ परेका चारै जनालाई लागुऔषध कसुरमा थप अनुसन्धान कार्य भइरहेको मोरङ प्रहरीले जनाएको छ ।