मोरङ: मोरङको बेलबारीमा श्रीमतिको हत्या गरि फरार एक व्यक्ति पक्राउ परेका छन् ।

पक्राउ पर्नेमा बेलबारी नगरपालिका ७ का ५६ बर्षीय अम्बिका घिमिरे रहेका छन् । उनले ४८ बर्षीय श्रीमति सीता घिमिरेलाई काठको मुंग्रोले प्रहार गरि हत्या गरेको प्रहरीको भनाई छ । जिल्ला प्रहरी कार्यालय मोरङका अनुसार मादक पदार्थ सेवन गरेर घरमा आएका घिमिरेको श्रीमतिसँग सामान्य विवाद भएको थियो । सामान्य वादविवाद पश्चात दुवै सुतेको र राती एक्कासी उठेर आवेसमा आएर घिमिरेले श्रीमतिलाई आक्रमण गरेको प्रहरीको भनाई छ ।

प्रहरीका अनुसार घिमिरेले काठको मुंग्रोले श्रीमतिको बाँया कञ्चटमा ४, ५ पटक प्रहार गरेर हत्या गरेका थिए । त्यसपछि सिरानीले मुंग्रो लुकाएर उनी फरार भएको जिल्ला प्रहरी कार्यालय मोरङका प्रहरी निरीक्षक मिलन थापाले जानकारी दिए । फरार भएका घिमिरेलाई ईलाका प्रहरी कार्यालय बेलबारीले आज बिहान करिब ५ बजे घरदेखि करिब २ किलोमिटर दक्षिणमा रहेको खाली ग्वालीबाट नियन्त्रणमा लिएको थियो । उनलाई ज्यान सम्बन्धी कसुरमा थप अनुसन्धान भइरहेको प्रहरीले जनाएको छ ।