_1704867435.jpeg)
धरान: संघीय सरकारका खानेपानी मन्त्री राजेन्द्रकुमार राईले आगामी आर्थिक बर्षमा सप्तकोशी खानेपानी योजनालाई डिपिआरले लागत अनुमान गरे बमोजिमको पर्याप्ट बजेट विनियोजन गरेको बताएका छन् ।
धरानका मेयर हर्क साम्पाङको कार्यकक्षमा आज बिहान भेटघाटको क्रममा मन्त्री राईले उक्त कुरा खुलाएका हुन् । उनका अनुसार सप्तकोशी योजनाको डिपिआर वमोजिम ५ अर्ब ७२ करोड ५६ लाख रुपैया विनियोजन गरिएको छ । ‘हरेक कुरामा शंका किन गर्नुहुन्छ ? म जे बोल्यो त्यही गर्ने मान्छे हो,’पत्रकारको प्रश्नमा उनले भने,‘सरकारले निर्णय गर्यो, कार्यान्वयन हुन्छ भनेर विश्वस्त हुनुस् ।’
बजेटमा धरानको खानेपानीको बारे उल्लेख नभएकोप्रति उनले भने केहीलाई मात्र हाइलाइट गरिएको स्पष्ट पारे । मन्त्री राईले भने,–‘केही चिजलाई मात्र हाइलाइट गरिएको हुन्छ । सबै त लेखेर सम्भव पनि हुदैन ।’ मन्त्री राईले नेपाल सरकार धरानलाई पानी खुवाउने कुरामा प्रतिवद्ध भएको जिकिर गरे । ‘ढिला नगरि चतरा कोशीबाट पानी ल्याउन आउने आर्थिक बर्षमा टेण्डर हुन्छ, ढुक्क हुनुस्,’ मन्त्री राईले भने ।
तमोरको पानी सुरुङबाट ल्याउन सहज हुन्छ भन्ने तर्क पनि भइरहेको भन्दै मन्त्री राईले त्यसप्रति तत्काल आफ्नो चासो नभएको पनि संकेत गरे । ‘त्यो अलिक पछिको कुरा हो । यो आयोजना सम्पन्न गरेपछि धरानको खानेपानीको समस्या धेरै समाधान हुन्छ,’ उनले भने ।
भिडियो:
