_1704867435.jpeg)
धरान: दुई पटक प्रयास गर्दा पनि हुन नसकेको धरान उपमहानगरपालिकाको १५ औं नगरसभा आइतबार हुने भएको छ ।
आइतबार दिउँसो ३ बजेको लागि उपमहानगरपालिकामै नगरसभा हुने भन्दै प्रमुख प्रशासकीय अधिकृत भुपेन्द्र राईले उपमेयर, वडाअध्यक्ष र कार्यपालिका सदस्यहरुलाई पत्राचार गरेका छन् । उक्त पत्रमा पहिलो एजेण्डाकोरुपमा आर्थिक बर्ष २०८१/०८२ को नीति तथा कार्यक्रम रहेको छ भने दोस्रो एजेण्डामा आर्थिक विधेयक, विनियोजन विधेयक र बजेट तथा कार्यक्रम राखिएको छ भने तेस्रो एजेण्डामा विविध रहेको छ ।
यसअघि असार १० गते सैनिक भवनमा नगरसभा शुरु नै नभई भाडिएको थियो भने असार ३१ गते पनि वीपी कोइराला स्वास्थ्य विज्ञान प्रतिष्ठानको अडोटरियम हलमा सभा बस्न सकेको थिएन । असार १० गते बजेट विना नगरसभा गर्ने कि नगर्ने भन्ने विवादले हुन सकेन भने पछिल्लो पटक करारमा रहेका कर्मचारीहरुको म्याद थप गर्ने कि नगर्ने भन्ने विवादले नगरसभा हुन सकेको थिएन ।
असार भित्र नगरसभाबाट बजेट, नीति तथा कार्यक्रम पास हुन नसकेपछि धरान बजेट होलिडेको स्थितिमा छ । अहिले अत्यावश्यक सेवाबाहेक सम्पुर्ण कर वा शुल्क लिने कार्य ठप्प छ । ‘अत्यावश्यक सेवा नागरिकता, जन्मदर्ता पञ्जिकरणलाई गतसालको दररेटमा फरक नपर्ने गरि कामचलाउ भइरहेको छ,’ उनले भने,‘जनताको अत्यावश्यक काम रोक्न भएन, त्यसैले फुकाउनको लागि मात्र यस्तो गरिएको हो । अरु कर, शूल्क केही लिन मिल्दैन ।’
प्रमुख प्रशासकीय अधिकृत राईका अनुसार दिउँसो ३ बजे नगरसभा हुनुअघि बिहान ८ बजे कार्यपालिका बैठक हुनेछ । उक्त बैठकमा सहमति गरेर दिउँसो ३ बजे नगरसभा गर्ने तालिका रहेको उनले बताए । ‘करार कर्मचारीको बिषयमा प्रदेश लोकसेवाले पनि वर्कआउट गर्दैछ । २०७४ भन्दा अघिका कर्मचारीलाई लोकसेवा भिड्न दिने वा गोल्डेन ह्याण्डचेक गर्ने हुन्छ । त्यसपछिकालाई पनि प्रदेशले कार्यविधि बनाउदैछ,’ प्रमुख प्रशासकीय अधिकृत राईले भने,‘त्यो बिषयमा कार्यपालिकामा उचित निर्णय हुने अपेक्षा छ ।’
विवादित बिषय समाधान गर्न विभिन्न चरणमा छलफल
नगरसभा रोकिनुको कारक बनेको करार कर्मचारीहरुको म्याद थपको बिषयमा विभिन्न चरणमा छलफल भएर नै नगरसभाको मिति तोकिएको उपमेयर अइन्द्रबिक्रम बेघाले जानकारी दिए । उनका अनुसार कार्यपालिका बैठकबाट विवादित बिषय समाधान हुनेछ ।
विवादित बिषयलाई समाधान गर्न विभिन्न चरणमा छलफल भएर निकास आएको पनि उपमेयर बेघाले बताए । ‘विवादित बिषयमा छलफल भएर समाधान गर्न विभिन्न चरणमा छलफल भएको छ । समाधान हुने कुरा छ,’उनले भने,‘करिब करिब कुरा मिलेको छ । दैवको आँखा लागेन भने भनेजस्तै केही भइहालेन भने आइतबार ३ बजे नगरसभा हुन्छ ।’
