_1704867435.jpeg)
धरान: मुक्कुमलुङ पाथीभारामा केवलकार बनाउनुपर्ने पक्षका पदम मावोलाई कालोमोसो दलेको घटनामा संलग्न नो केवलकार पक्षका व्यक्तिहरुलाई पक्राउ गर्न प्रहरीले आइतबार राती चुम्लुङ हिम घेराउ गरेको छ ।
धरान १५ स्थित किरात याक्थुङ चुम्लुङ हिममा बसेका नो केवलकार पक्षका युवाहरुलाई पक्राउ गर्न मध्यराती प्रहरी पुगेको थियो । आइतबार दिउँसो धरानमा आयोजित पत्रकार सम्मेलनमा सहभागी ताप्लेजुङ निवासी मावोलाई नो केवलकार पक्षका व्यक्तिहरुले कालोमोसो दलेका थिए । उक्त घटनापछि मावोले जाहेरी दिएको कारण खोजी गर्ने क्रममा चुम्लुङ हिममा आउनु परेको प्रहरीको भनाई छ । मावो मुक्कुमलुङ पाथीभारा क्षेत्रमा केवलकार बनाउनुपर्छ भनेर वकालत गर्ने र नो केवलकार पक्षलाई तथानाम भन्ने गरेको आरोप आन्दोलनरत पक्षको रहेको छ ।
प्रहरी निरीक्षकको कमाण्डमा पुगेको प्रहरी टोली मध्यराती १२ बजेतिर खाली हात फर्कनुपरेको थियो । चुम्लुङ हिमको अतिथि गृहको कोठाभित्र बसेर नो केवलकार पक्षका युवाहरुले सामाजिक सञ्जाल फेसबुकमा लाइभ गर्दै प्रहरी पक्राउ गर्न आएको सार्वजनिक गरेका थिए । त्यसको विरोधमा सामाजिक सञ्जालमा मुक्कुमलुङ संरक्षण संघर्ष समिति, नो केवलकार अभियानका व्यक्तिहरु सञ्जालमा बोल्न थालेका थिए भने पत्रकार, नागरिक अगुवाहरु पनि चुम्लुङमा भेला हुन थालेका थिए ।
सम्पुर्ण लिम्बु जातिको साझा संस्थाकोरुपमा रहेको चुम्लुङ हिममा प्रहरी प्रवेश गरेको सार्वजनिक भएपछि चुम्लुङका नेतृत्वहरु पनि भेला हुन थालेपछि प्रहरी दबाबमा परेको थियो । अन्ततः मध्यराती १२ बजे प्रहरी टोली खाली हात फर्किन बाध्य भयो ।
सञ्चारकर्मीसँग प्रतिक्रिया दिदै पहिचानवादी मोर्चाका युवा नेता जेन्टल लावतीले कुनै ठुलो जघन्य अपराध गरेजस्तै आफुहरुलाई पक्राउ गर्न प्रहरी मध्यराती चुम्लुङ हिममा प्रवेश गरेको भन्दै आक्रोश पोखे । सोमबार दिउँसो २ बजे सामुहिक गिरफ्तारी दिने भन्दाभन्दै पनि राज्य दमनमा उत्रिएको भन्दै उनले आन्दोलन थप सशक्त बनाउने बताए । राष्ट्रिय जनमुक्ति पार्टीका केन्द्रीय अध्यक्ष केपी पालुङ्वाले मुक्कुमलुङ संरक्षणको आन्दोलनलाई कमजोर बनाउन राज्यले दमन गर्न खोजेको बताए ।
भिडियो:
