नयाँ वर्षमा सुनसान भेडेटार र इलाम

धरानः आज नयाँ वर्षको पहिलो दिन । अरु बेला खचाखच हुने पूर्वको प्रमुख पर्यटकीय गन्तव्य मध्येका भेडेटार र इलाम आज भने सुनसान छन् ।

अरु बेला पर्यटकको स्वागतमा भ्याइ नभ्याइ हुने यस ठाउँका व्यवसायी निराश छन् । सरकारले तय गरेको भ्रमण वर्ष २०२० लाई भव्य रुपमा सफल बनाउन थप लगानी भित्र्याएका व्यवसायी निराश बनेका हुन । धरानबाट केही मिनेटको सवारी दुरीमा पुगिने भेडेटार धेरैको रोजाइको स्थान हो । गमी मौसममा छिमेकी मुलुक भारतका सर्वसाधारणको समेत घुइँचो लाग्ने यहाँ यो पटक भने सुनसान रहेको छ ।

पर्यटन व्यवसायी लिलाराज लावतीका अनुसार अरु बेला ठुलो भिडभाड हुने ठाउँमा पहिलो पटक यस्तो सुनसान भएको हो भने व्यापार ठप्प भएको हो । ‘यहाँका व्यवसायीले यस्तो कहिले भोगेका थिएनन्,’लामो समय व्यवसाय गरिरहेका लावतीले भने,‘लकडाउन लम्बिरहे यहाँका धेरै व्यवसायी सडकमा आउने अवस्थाको देखियो ।’

भेडेटार होटल एसोसिएसनका अध्यक्ष जीतेन्द्र रुम्मदालीले बैँकको ऋण गरेर पर्यटन क्षेत्रमा हाल हालेका नयाँ व्यवसायी थप समस्यामा परिरहेको बताए । सरकारी योजनालाई सफल बनाउन व्यवसायमा थप लगानी गरेका पुराना व्यवसायीलाई समेत ऋणको बोझले समस्या निम्तिने रुम्दालीको भनाइ छ । भेडेटारमा मात्रै साना ठुला गरि एक सय भन्दा बढि होटल, रिसोर्टहरु रहेका छन् । दैनकी करिव ५० लाख कारोवार हुने यो स्थान ठप्पै छ ।

उता इलामको कन्याम, अन्तु लगाएतका स्थानसमेत सुनसान छ । अरु बेला पर्यटकको भरिभराउ चाप हुने ठाउँ शुन्य हुँदा हजारौँ व्यवसायी मर्कामा परेको व्यवसायी रुद्र घिमिरेले जानकारी दिए । उनका अनुसार अघिल्लो साल यो बेला पर्यटकले भरिभराउ यहाँका होटल र कटेज यो पटक बन्द छन् । टाढाटाढा देखि आउने पर्यटकले अनलाइन बुकिङसमेत गर्न थालिसकेको अवस्थामा कतै व्यवसाय नै धरापमा त पर्ने होइन ? उनीहरुलाई चिन्ता लागिरहेको छ ।

अर्का व्यवसायी धरणीधर घिमिरेले इलामा सन्दकपुर, कन्याम लगाएतका पर्यटकीय स्थान सुनसान छन् । कोरोना संक्रमणको कारण मुलुक लकडाउनमा परेसँगै पर्यटन क्षेत्र धरासायी बनिरहेको छ । त्यसको प्रत्यक्ष असरमा पूर्वका पर्यटन व्यवसायी पनि छन् । थप लगानी गरेका र यस क्षेत्रमा आएका नयाँ व्यवसायी टाट पल्टिने अवस्थामा पुुगेको उनीहरुको गुनासो छ ।