_1704867435.jpeg)
धरान: ठगी गर्ने समुहले धरानमा सुन भन्दै पित्तल दिएर एक महिलाको सक्कली सुनको बाला लिएर फरार भएका छन् ।
धरान १५ की कोकोनट हाउस नजिकैकी ५३ बर्षीया दिलमाया लिम्बुलाई तीन जनाले ठगी गरेको हो । ती युवाहरुले दिलमायाको हातमा भएको ३ तोला सुनको बाला लिएर भागेका छन् भने उनले बजारमा किनेको थर्मस र तरकारीको झोला पनि लगेको पीडित महिलाले जानकारी दिइन् । उनका अनुसार उनी विजुलीको बिल तिरेर फर्कदा आज दिउँसो यो घटना भएको हो । थर्मस र तरकारी पनि किनेर घर फर्कदै गर्दा बर्षा भएपछि उनी भानुचोकस्थित घण्टाघरमा ओत लागेकी थिइन् । त्यही बेला एक अपरिचित युवा आएर उनीसँग बोलेका थिए । ती युवाले आफु धनकुटा पार्सल पुर्याउन जान लागेको भन्दै गाडी कति बेला आउछ भनेर ती महिलालाई सोधेका थिए । आफुले थाह छैन भन्ने जवाफ दिएको उनले बताइन् ।
लगत्तै अर्का एक व्यक्ति आएर ती युवासँग कुराकानी गरेको र आफुलाई तत्काल २ लाख रुपैया चाहिएको छ भन्दै कुरा गरेका थिए । उनले आफुसँग १० तोलाको सुन छ भन्दै देखाएको बताइन् । ‘मलाई २ लाख पैसा चाहियो भन्दै मसँग कुरा गर्ने केटालाई भन्यो । मसँग यो सामान मसँग छ, यो सामान लिनु भनेर सुन देखायो,’महिलाले भनिन्,‘उनीहरुले मलाई यो राखेर पैसा दिनुस् न भन्यो, मैले छैन भनेपछि हामी २ जना मिलेर किनौं न त भन्यो ।’
आफु किन्न नसक्ने भनेपछि ती दुवै युवाले बिक्री गर्न सहयोग गरे १ तोला सित्तैमा दिने प्रस्ताव गरेको ती महिलाले बताइन् । त्यसपछि, आफुले सुन नक्कली हो कि सक्कली हो भन्दा सुन पसलेलाई बोलाएर चेक गरौं भनेर दुवै युवाले भनेको पनि उनले सुनाइन् । ‘अनि, एक जनाले फोन गरेर सुन पसलेलाई बोलाउछुँ भनेर फोन गर्यो, अर्को मान्छे आएर सामान हेरेर सक्कली सुन नै हो ९, १० तोला हुन्छ भन्यो,’ती महिलाले भनिन्,‘त्यसपछि तपाई यो सुन बोक्नुस् भनेर मेरो हातको बाला माग्यो ।’
ती महिलाले हातको बाला पनि दिइन् । त्यसपछि, सुन पसले भएर आएकोले राँगाचोकमा आफ्नो पसल भएकोले त्यहाँ जाउ भनेपछि उनीहरु हिडेर पुतलीलाइनतिर लागेका थिए । भानुचोकदेखि केही पश्चिम आचार्यलाइनतर्फ झर्ने बाटोमा पुगेपछि भने ३ जना नै फरार भएको ती महिलाले बताइन् । उनका अनुसार उनीहरुले बजारमा किनेको थर्मस र सब्जी भएको झोला पनि लिएर भागेका छन् । त्यसपछि सुन पसलमा पुगेर जाँच गर्दा ती युवाहरुले दिएको सामान सुन नभै पित्त भएको रहस्य खुल्यो । ती महिलाले वडा प्रहरी कार्यालयमा गएर उजुरी दिएकी छिन् ।
