_1704867435.jpeg)
धरान: कोरोना महामारी र लकडाउनको कारण बन्द भएको धरान १७ स्थित एन्फा एकेडेमीलाई पुनः सञ्चालन गर्ने तयारी थालिएको छ ।
स्कुलहरु पनि सञ्चालन हुने सम्भावना बढेपछि एन्फा एकेडेमी मेनेजमेन्ट कमिटीले एकेडेमीलाई सञ्चालन गर्ने तयारी गरेको हो । हाल एकेडेमीलाई धरान उपमहानगरपालिकाले क्वारेन्टिनस्थलकोरुपमा प्रयोग गरिरहेको छ । मेनेजमेन्ट कमिटीले अब स्कुलहरु सञ्चालन भएसँगै उमेर समुहका खेलाडीहरुलाई राख्नुपर्ने भएकोले आवश्यक तयारी गर्नको लागि क्वारेन्टिन हटाइदिन आग्रह गरिसकेको छ । ‘अब स्कुलहरु चाडै सञ्चालनमा आउने कुरा छ । त्यसैले हामीले पनि बच्चाहरु ल्याएर राख्नुपर्ने भएकोले अहिलेदेखि नै तयारी गरिसक्नुपर्छ,’मेनेजमेन्ट कमिटीका सचिव प्रताप तामाङले भने,‘हामीले उपमहानगरपालिकालाई पत्राचार गरेर क्वारेन्टिन हटाइदिन आग्रह गरिसकेका छौं ।’
विदेशबाट आउने व्यक्तिहरुबाट संक्रमणको जोखिम बढ्ने भएकोले घरपरिवारमा सिधै जान नदिई केही दिन एन्फा एकेडेमीको क्वारेन्टिनमा राख्ने गरिएको थियो । पिसिआर परीक्षण गरेपछि पोजेटिभ आए वीपी प्रतिष्ठानमा र नेगेटिभ आए घर पठाउन थालिएको थियो । अचेल भने क्वारेन्टिनमा राख्नुपर्ने व्यक्तिहरु नभएकोले एन्फा एकेडेमी स्वाब संकलन गर्ने थलो मात्र बनेको छ । ‘हामीलाई तयारीको लागि ढिलाई भइसक्यो । मैदान धेरै नै सुक्खा भइसकेछ । घाँस पनि धेरै पलाएको छ । कोठाहरु ज्यादै अव्यवस्थित छ,’तामाङले भने ।
आज बिहिबार दिउँसो धरान गल्फ क्लबको घाँस काट्ने मेशिन र ट्याक्टर ल्याएर घाँस काटिएको थियो । उपमहानगरले औपचारिकरुपमा क्वारेन्टिन हटाएको जानकारी नदिए पनि मेनेजमेन्ट कमिटीले एकेडेमी सञ्चालनको लागि तयारी शुरु गरेको छ । एन्फाले धरानको एकेडेमीको लागि गत बर्षदेखि १४ बर्ष उमेर समुहका २६ जना बालखेलाडीहरु छनौट गरेर राखेको छ । यहाँ उनीहरुलाई खान बस्न, पढाई र फुटबल प्रशिक्षणको व्यवस्था गरिएको छ । ती २६ जना मध्ये ३ जना मात्र धरानका हुन् । उनीहरु धरान १८ स्थित माउण्ट हर्मोन एकेडेमीमा पढ्छन् । ‘भच्र्युल मिटिङ भएको थियो । बच्चाहरु कहिलेदेखि स्कुल लाग्छ भनेर उत्साहित छन् । हामीलाई फोन गरेर पनि सोधेको सोधेकै गर्छन्,’सचिव तामाङले भने,‘स्कुलहरु शुरु हुनुबित्तिकै आउछन्, त्यसैले हामीले तयारी थालेको हो ।’
