_1704867435.jpeg)
धरान: वीपी कोइराला स्वास्थ्य विज्ञान प्रतिष्ठानका चिकित्सक एवं संयुक्त संघर्ष समितिका सहसंयोजक डा.विष्णु पोखरेलले बेथितीको जड भ्रष्ट पदाधिकारीहरु र उनीहरुले पाउने कमिशन भएको बताएका छन् ।
संघर्ष समितिको आह्वानमा आइतबार धरानका राजनीतिक दल, नागरिक दबाब समुहसहित निस्केको वृहत र्याली पश्चात आयोजित कोणसभामा डा.पोखरेलले यस्तो बताएका हुन् । प्रतिष्ठान हाताभित्र निर्माण गरिएको वीपी कोइरालाको सालिक अघि उभिएर डा.पोखरेलले सर्वसाधारण जनता अस्पताल आइसके पछि उपचार पाउन धेरै सास्ती व्यहोर्नुपर्ने पनि बताए ।
‘जनता अस्पताल आइसके पछि उपचार गर्न पटक पटक काउन्टरमा धाउनुपर्ने, जाँच गर्न पनि बाहिर जानुपर्ने, सिटि र एमआरआई गर्न विराटनगर, विर्तामोडसम्म जानुपर्ने बाध्यता छ,’डा.पोखरेलले भने,‘यस्तै बेथिती पटक पटक प्रशासनलाई ध्यानाकर्षण गराउदा, पटक पटक औल्याउदा पनि सुधार भएन । यसको जड भ्रष्ट पदाधिकारी र उहाँहरुले पाउने कमिशन, आर्थिक लेनदेन नै हो भन्ने बुझेको कारणले आन्दोलनमा आउनुपरेको हो ।’
डा. पोखरेलले अहिलेको आन्दोलन कुनै डाक्टरको तलब नआएको वा प्रशोसन नभएको भन्ने मागभन्दा धेरै माथि उठेको पनि प्रष्ट पारे । वीपीमा भएको भ्रष्टचारको डंगुर, जनताले पाउने कष्टलाई अन्त्य गर्नकै लागि धराने जनतासमेत उठेर आन्दोलन भइरहेको उनले बताए । ‘यो आन्दोलनले विपीलाई सुधार गर्छ भन्ने आशा लिएका छौं, तर यो तबमात्र सम्भव छ, जब धरान र प्रदेश १ का जनताहरुले वीपीको भ्रष्टचारबारे थाह पाउनुहुनेछ, र यो आन्दोलनमा हामीले पनि साथ दिनुपर्छ, भ्रष्टचारीहरुलाई पुच्छरमा आगो लगाएर खेद्नुपर्छ भनेर जाग्नुहुन्छ,’डा.पोखरेलले भने ।
विगत २८ दिनदेखि आन्दोलन जारी रहे पनि सरकार नै भ्रष्टहरुलाई बचाउन लागिपरेको प्रष्ट भइसकेको डा.पोखरेलले बताए । धरानका राजनीतिक दल, नागरिक समाज पनि उठेको र राजधानीमा पनि निरन्तर आन्दोलन भइरहेको कारण अब आन्दोलन सफलताउन्मुख रहेको उनले बताए । ‘प्राज्ञिक व्यक्तिहरुले गलत भनेको कुरालाई गम्भीरतापुर्वक लिनुपर्छ, तर हाम्रो कुलपति, सहकुलपतिले गम्भीरतापुर्वक लिएका छैनन्,’उनले भने,‘धरानका राजनीतिक दल, नागरिक समाज, जनताहरु हामीसँग हातेमालो गर्दैहुनुहुन्छ । हामी सफलता उन्मुख छौं, शिक्षा र स्वास्थ्यमा राजनीतिकरण गर्न हुदैन, र अब साच्चिनै प्राज्ञिक सर्वोच्चता स्थापित हुनेछ।’
