_1704867435.jpeg)
धरान: राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले धरानमा पानीसमेत खुवाउन नसक्ने ठुला पार्टीहरुलाई अझै कति बोक्ने ? भन्दै मतदाताहरुलाई प्रश्न गरेका छन् ।
राप्रपा सुनसरी क्षेत्र नं १ को धरानको भानुचोकमा बिहिबार आयोजित चुनावी सभालाई सम्बोधन गर्दै लिङ्देनले तीन दशकसम्म सत्तामा रहेका कांग्रेस र कम्युनिष्टहरुले धरानमा पानीसमेत खुवाउन नसकेकोले मंसिर ४ गते विचार पुर्याएर मात्र भोट दिन आग्रह गरे । उनले भने,‘तीन दशकसम्म मौका पाउदा पनि धरानलाई काकाकुल बनाइराख्यो । पानीको व्यवस्था पनि गर्न सकेन, ती पार्टीहरुलाई अझै कति बोकेर हिड्नुहुन्छ ?’
लिङ्देनले यसपटक राप्रपालाई सहयोग गर्न आग्रह गर्दै खुलेर आउने नसके पनि गोप्य मतदानको बेला हलोमा भोट दिएर कांग्रेस, कम्युनिष्टका बिग्रिएका नेतालाई सुधार्ने मौका भएको बताए । ‘खुलेर आउने आँट भएन भने कांग्रेस र कम्युनिष्ट नै भइरहनुस । जसरी नभनिकन, कुनै जुलुसमा ननिस्किकन गन्ने बेला मात्र ठुला दलहरुले थाह पाउने गरि हर्क सम्पाङलाई जिताउनुभयो, त्यसरी नै यसपाली राप्रपालाई जिताइदिनुस् । भोट हलोमा हालिदिनुस्, गन्दा मात्र थाह पाओस्,’उनले भने ।
मंसिर ४ गते आफ्ना नेताहरुलाई सुधार्ने हो भने उनीहरुको बाकस खाली बनाउन अपिल गर्दै लिङ्देनले तब मात्र जनता बाठो भइसकेछ भनेर नेताहरुले थाह पाउने बताए । ‘जब उनीहरुको बाकस खाली हुन्छ तब मात्र थाह पाउछन् कि जनता बाठो भइसकेछन् । अनि उनीहरुको २ वटा विकल्प हुन्छ, कि राजनीति छोड्ने कि सुघ्रिएर अगाडि बढ्ने । दुवै विकल्प देशको हितमा हुन्छ,’उनले भने ।
लिङ्देनले भ्रष्टचार गर्ने पार्टी र भ्रष्टचारीहरुमाथि डोजर चलाउन मन भएको पनि बताए । आफु एक रुपैया पनि भ्रष्टचार नगर्ने प्रतिवद्धतामा अडिग रहेको र व्यवहारमा नै उतारेको दाबी गर्दै भ्रष्टचार गर्नेहरुमाथि डोजर चलाउन मन भएको बताए । नेपालका ठुला भनिएको पार्टी कांग्रेस र कम्युनिष्टहरु झगडा गरिरहे पनि खानेबेला भने एकजुट हुने गरेको पनि उनले बताए ।
भिडियो:
