_1704867435.jpeg)
धरान: असार १० गते उद्घाटन भएर स्थगित गरिएको धरानको १३ औं नगरसभामा असार २१ गते बस्ने मिति तोकिएको थियो । उक्त नगरसभामा नीति तथा कार्यक्रम र १ अर्ब ७१ करोडको बजेट पेश गरिएको भएपनि कार्यपालिका बैठकबाट नै वडाको सिलिङ, बिषयगत समितिको ब्रेकडाउनलगायत पारित भएको थिएन ।
नगरसभा उद्घाटनमा ३ जना नगरसभा सदस्यहरुले नीति तथा कार्यक्रम र बजेटमाथि सुझावसहित धारणा राख्दै संशोधनको माग गरेका थिए । नगरसभा स्थगित भएपछि बसेको कार्यपालिका बैठकमा पनि नीति, कार्यक्रम र बजेटमा सहमति जुटेन, र असार २१ गते बस्ने भनिएको नगरसभा असार २५ गतेलाई सार्ने निर्णय गरिएको थियो । अब मात्र २ दिन बाँकी रहदा आज (शनिबार) बसेको कार्यपालिका बैठकबाट पनि नीति तथा कार्यक्रम, वडागत र बिषगयत कार्यक्रमहरुमा सहमति जुट्न सकेन ।
वडाहरुले बजेट ब्रेक डाउन गरेर कार्यक्रमरु योजना तर्जुमा समितिमा पठाएका छैनन् भने सामाजिक विकास समितिले गरेको ब्रेक डाउनलाई योजना तर्जुमा समितिले फेरवदल गरेको भन्दै समिति सभापति सृर्जना नेपालले असन्तुष्टी जनाइन् । यस्तै, नीति तथा कार्यक्रममा सुझावसहित संशोधन गर्न गरिएको लिखित आग्रहलाई पनि वेवास्ता गरिएकोले पारित नगर्ने वडा १५ का अध्यक्ष नरेश इवारम र अनुप देवानले अडान राखेका थिए । नीति तथा कार्यक्रम र बजेटप्रति असन्तुष्ट वडाअध्यक्ष एवं कार्यपालिका सदस्यहरु एमालेबाट निवार्चित हुन् । कार्यपालिका बैठक र नगरसभामा एमालेको बहुमत छ ।
सहमति नजुटेपछि कार्यपालिका बैठक नगरसभा हुने दिन सोमबार बिहान ८ बजे बस्ने निर्णय भएको छ । त्यसअघि आइतबार नै वडाहरुले बजेट ब्रेकडाउन गरेर पठाउने र दिउँसो २ बजे योजना तर्जुमा समितिको बैठक बसेर बाँकीरहेको बिषयहरु टुंग्याउने समिति संयोजक एवं उपमेयर अइन्द्रबिक्रम बेघाले जानकारी दिए ।
भिडियो:
भिडियो:
