_1704867435.jpeg)
धरान: विगत तीन बर्षदेखि परिवर्तनका लागि सामाजिक अभियानले धरानका विभिन्न वडाहरुमा निःशुल्क सामाजिक स्वास्थ्य शिविर आयोजना गर्दै आएको छ ।
अस्पतालहरुमा पुग्न समस्या हुने ज्येष्ठ नागरिकहरुलाई घर नजिकै उपचार सेवा तथा परामर्श दिने उद्देश्यले सामाजिक स्वास्थ्य शिविर गरिएको हो । यो शिविरमा बिशेष गरि मुटु, मधुमेह र रक्तचापका विरामीहरुको स्वास्थ्य परीक्षण हुन्छ । विरामीहरुलाई वरिष्ठ मुटु रोेग विशेषज्ञ डा. प्रशान्त शाहले परिक्षण गर्छन् । साथै, निःशुल्करुपमा सुगर परिक्षण र औषधि वितरण पनि हुने गरेको अभियानका अध्यक्ष विष्णु बरालले बताए ।
उनका अनुसार यो अभियान ज्येष्ठ आमा बुबाको सुस्वास्थ्य र दीर्घायुको लागि लक्षित हो । शिविर पाक्षिकरुपमा दोस्रो साताको शनिबार आयोजना हुन्छ । हालसम्म ५ हजार बढी ज्येष्ठ नागरिकहरु यो शिविरबाट लाभान्वित भइसकेको पनि अध्यक्ष वरालले जानकारी दिए । उनले भने,“हामीले बुवाआमाको सुस्वास्थ्य र दीर्घायुको निम्ति विगत ३ वर्षदेखि सामाजिक स्वास्थ्य क्लिनिक आयोजना गरिरहेका छौं । अहिलेसम्म ५ हजार बढीले सेवा पाइसक्नु भएको छ ।”
शिविरमा मुटुका विरामीहरुको पेसमेकरको अवस्था, ब्याट्रीको जाँच र आयुको पनि जाँच गर्ने गरेको उनले बताए । बिरामी हुनुभन्दा रोग लाग्न नदिन विशेष गरि खानपान सम्बन्धमा डाक्टर शाहले सुझाव दिने गरेको समेत बरालको भनाई छ । यो शिविर धरानका वडाहरु र सामाजिक संस्थाहरुसँग सहकार्य गरेर गरिने पनि उनले बताए ।
यही शनिबार (चैत्र ३ गते) धरान रेडिमेट व्यापार संघको सहकार्यमा शिविरको ५४ औं संस्करण पनि सम्पन्न भएको छ । सुनसरी उद्योग वाणिज्य संघको भवनमा आयोजित शिविरमा ९५ जना जेष्ठ नागरिकहरुको स्वास्थ्य परिक्षण गरिएको कार्यक्रम संयोजक सुशिर बरालले बताए । शिविरमा वी.पी.कोईराला स्वास्थ्य विज्ञान प्रतिष्ठानका स्टाफ नर्स उषा चौधरी र स्वेता भण्डारीले रक्तचाप र सुगर परिक्षण परिक्षण गरेका थिए ।
सुनसरी उद्योग वाणिज्य संघका अध्यक्ष विजय श्रेष्ठको प्रमुख आतिथ्यतामा सम्पन्न उक्त शिविरको समापन कार्यक्रममा धरान रेडिमेड संघका अध्यक्ष ज्ञानशोभा शाक्यले यस्तो कार्यक्रममा सहकार्य गर्न पाएकोमा खुशीसँगै आभार प्रकट गरेकी थिइन् । उक्त कार्यक्रममा मोहन श्रेष्ठ, वर्षा श्रेष्ठ, हेम ढकाल, जेनिश शाक्य लगायतका अभियन्ताहरुको सक्रिय सहभागिता रहेको थियो ।
