धरान: राजावादी आन्दोलनको समाचार संकलनको क्रममा सञ्चारकर्मी सुरेश रजकको हत्या भएको घटनामा संलग्नहरुको खोजी गरेर कारबाहीको दायरामा ल्याउन नेपाल पत्रकार महासंघ सुनसरीले माग गरेको छ । 

महासंघले सोमबार जिल्ला प्रशासन कार्यालय सुनसरीमार्फत गृहमन्त्रालयमा ध्यानाकर्षण पत्र पठाउदै यस्तो माग गरेको हो । 'समाचारको लागि भिडियो खिचिरहेका एभिन्युज टेलिभिजनका पत्रकार सुरेश रजकको हत्याले हामी मर्माहत भएका छौं,' ध्यानकर्षण पत्रमा भनिएको छ, 'पत्रकार सुरेश रजकलाई हत्या गर्ने समूह वा व्यक्तिको खोजी गरी कारबाहीको दायरामा ल्याउन गृहमन्त्री समक्ष जोडदार माग गर्दछौं ।' 

उक्त घटनाको ठोस अनुसन्धान भई न्याय पाउने विश्वास पनि पत्रमा उल्लेख गरिएको छ । शान्तिपूर्ण आन्दोलनको नाममा अराजक गतिविधिलाई प्रसय दिइरहेको समूहले सञ्चार गृहमा तोडफोड गर्ने देखि पत्रकारमाथि आक्रमण भएको विषयमा महासंघले गृह मन्त्रालयको ध्यानाकर्षण गराएको छ । यस्तै, शुक्रवार काठमाडौं आन्दोलनको क्रममा अन्नपूर्ण मिडिया ग्रुपको भवनमा तोडफोड, हिमालयन टेलिभिजनको सवारी साधन तोडफोड र कान्तिपुर टेलिभिजनको भवनमा डुङ्गामुढा भएको घटनामा महासंघले घोर भर्त्सना पनि गरेको छ । 

'प्रेस तथा अभिव्यक्ती स्वतन्त्रता, मानवअधिकार तथा लोकतन्त्रको विरुद्धमा भएका यस्ता गतिविधिको नियन्त्रण र कडा कारवाही हुनुपर्ने महासंघको ठहर छ,' पत्रमा भनिएको छ, 'आन्दोलनको नाममा सञ्चारकर्मीको हत्यागर्ने, प्रेसलाई आतङ्कित र त्रसित बनाउने गलत गतिविधिलाई स्विकार गर्न सकिँदैन ।' 

ध्यानाकर्षण पत्र ग्रहण गरेपछि सुनसरीका प्रमुख जिल्ला अधिकारी धर्मेन्द्रकुमार मिश्रले पत्र गृहमन्त्रालयमा पठाउने प्रतिवद्धता जनाए । साथै उनले राज्यको चौथौ अंग एवं समाजको ऐनाकोरुपमा रहेका पत्रकारको सुरक्षाको लागि सुनसरी प्रशासन गम्भीर भएको पनि बताए । प्रजिअ मिश्रले सञ्चारकर्मीहहरुलाइ सुरक्षाको प्रत्याभूति दिलाउने पनि प्रतिबद्धता जनाएका थिए ।