_1704867435.jpeg)
धरान: धरान उपमहानगरपालिका वडा नं ३ ले तीन दिने चन्द्रपुर जात्रा उत्सव मनाउने भएको छ ।
धरानमा नेवाः सँस्कृतिको मुल थलोकोरुपमा रहेको चन्द्रपुर बजार क्षेत्रको सास्ँकृतिक महत्वलाई थप उजागर गर्न र वडा ३ लाई साँस्कृतिक वडाकोरुपमा विकास तथा प्रर्वद्धन गर्न पहिलो पटक तीन दिने चन्द्रपुर जात्रा उत्सव मनाउने तयारी गरिएको हो । यो उत्सव वडा नं ३ को कार्यालयले नै आयोजना गर्न लागेको हो । चन्द्रपुर जात्रा समिति संयोजकको जिम्मेवारी नेवाः देय दबुका केन्द्रीय उपाध्यक्षसमेत रहेका अनिल मास्केलाई दिइएको वडाअध्यक्ष विद्या शाक्यले जानकारी दिए ।
वडा कार्यालयले बिहिबार पत्रकार सम्मेलन गरेर साउन ३०, ३१ र भदौ १ गते तीन दिने उत्सव आयोजना हुनेछ । संयोजक मास्केका अनुसार पहिलो दिन साउन ३० गते धिमेबाजा प्रतियोगिता एवं विभिन्न बाजाहरुको प्रस्तुती हुनेछ भने साउन ३१ गते कृष्ण जन्माष्टमी उत्सव, बृहत लाखे प्रर्दशनीसँगै अन्य जातीय साँस्कृतिक प्रर्दशनी हुनेछ । यस्तै, भदौ १ गते मौलिक साँस्कृतिक झाँकीसहितको कृष्ण रथ यात्रा र रात्री लाखे समापन कार्यक्रम हुने पनि संयोजक मास्केले जानकारी दिए ।
आधुनिक धरान स्थापनाकालदेखि नै चन्द्रपुर बजार क्षेत्र नेवाः सँस्कृतिको मुल थलो रहेको भएपनि यो वडामा बहुल जातिको बसोबास रहेकोले तीन दिने जात्राको क्रममा पनि बुहसँस्कृति झल्कने वडाअध्यक्ष शाक्यले बताए । ‘हाम्रो नेवाः सँस्कृतिको मुल थलो यही चन्द्रपुर बजार क्षेत्र हो, तर अहिले यहाँ हामी सबै जातजाति मिलेर बसेका छौं,’ वडाअध्यक्ष शाक्यले भने,‘जेसिसले डबली पनि बनाइदिदैछ, हामी वडा ३ लाई साँस्कृतिक वडा बनाउने अभियानमा छौं, धरानको सँस्कृति हेर्न यहाँ आउने हुनुपर्छ ।’ चन्द्रपुर जात्रा उत्सवलाई हरेक बर्ष निरन्तरता दिइने पनि उनले बताए ।
सप्ताहव्यापी गाईजात्रा महोत्सव
यसबर्ष धरानमा गाईजात्रा महोत्सव सप्ताहव्यापीरुपमा विभिन्न कार्यक्रमहरु आयोजना गरि मनाइने भएको छ । वडा नं ३ मा आयोजित पत्रकार सम्मेलनमा खड्गी समाज धरानको नेतृत्वमा गाईजात्रा महोत्सव मनाइने जानकारी दिइएको हो ।
नेपाल खड्गी सेवा समितिका अध्यक्ष मनिष खड्गीका अनुसार साउन २५ गतेदेखि २९ गतेसम्म भव्यताका साथ पृथकढंगले गाईजात्रा मनाउने तयारी भइरहेको छ । गाईजात्रा महोत्सव मनाउन श्यामकुमार खड्गी मुल संयोजक रहेका छन् । गाईयात्रा नेवारी समुदायले मनाउने भएपनि सम्पुर्ण जातजातिको पर्र्व भएको सन्देश प्रवाह गर्दे मनाइने समाजका अध्यक्ष मनिष खड्गीले बताए ।
गाईजात्रा महोत्सवको पहिलो दिन साउन २५ गते आइतबार ठ्याकठुके (घिन्ताङ घिसिङ) तथा सामुहिक गाईजात्रा हुने आयोजकले जनाएको छ । साउन २६ गते बिहान हिले यात्रा मनाउदै नगर परिक्रमा हुनेछ भने सोही दिन बेलुकी रोपार जात्रा हुनेछ । साउन २७ गते बाघ जात्रा (पल्टन), साउन २८ गते घोडे यात्रा र साउन २९ गते मारुनी नृत्य तथा गाईजात्रा समापन कार्यक्रम हुने खड्गीले जानकारी दिए।
भिडियो:
