_1704867435.jpeg)
धरान: नेपाल सरकारका मन्त्री तथा उज्यालो नेपाल पार्टीका परिकल्पनाकार कुलमान घिसिङले नयाँ वैकल्पिक शक्तिहरु एकजुट भएर अघि बढ्न आह्वान गरेका छन् ।
धरान १५ श्यामचोकस्थित बौद्ध गुम्बामा आयोजित धार्मिक समारोहलाई प्रमुख अतिथिकोरुपमा आइतबार सम्बोधन गर्दै मन्त्री घिसिङले यस्तो बताएका हुन् । उनले देश परिवर्तन गर्ने समयमा नयाँ भनिने वैकिल्पिक शक्ति भन्ने व्यक्तिहरु एकजुट भएर लाग्नुपर्ने बताए । उनले भने, ‘म सबैलाई आह्वान पनि गर्छु, अब एक भएर देशलाई समृद्धतर्फ अगाडि बढाउनको लागि नयाँ भन्ने र वैकल्पिक शक्तिहरु एउटाले अर्कोलाई गाली गर्ने होइन, एकजुट भएर अघि बढ्नुपर्छ ।’
मन्त्री घिसिङले आफु पनि एउटा वैकल्पिक शक्ति बन्ने र आफु पनि त्यसरी अघि बढ्ने बताए । श्रम सँस्कृतिक पार्टीका अध्यक्ष हर्क साम्पाङले गर्ने चर्को आलोचनातर्फ संकेत गर्दै मन्त्री घिसिङले भने,‘धरानमा सामाजिक सञ्जालमा विभिन्न किसिमका कुराहरु देखिरहेको छ, त्यसरी हामीले एकआपसमा हिलोछ्याप्ने काम नगरौं, एकतावद्ध भएर अघि बढौं । देशले परिवर्तन खोजेको बेला नयाँ वैकल्पिक शक्ति भन्ने व्यक्तिहरु एकजुट हुनुपर्छ ।’
मन्त्री घिसिङले देशको अवस्था अहिले गम्भीर रहेको उल्लेख गर्दै यो अवस्था आउनुमा राजनीतिक व्यक्तिहरु र देशको नेतृत्व गर्नेहरुको बढी भुमिका रहेको पनि बताए । सुशासन, भ्रष्टचारमुक्त, सामाजिक न्याय, युवाहरुलाई रोजगारी पाएमात्र देशले सहि दिशामा अघि बढ्ने बताए । ‘लामो समयसम्म निराशा, आक्रोशमा देश रुमलिरह्यो, त्यसको विष्फोट भएको थियो, अस्तिको जेनजी आन्दोलन,’ उनले भने,‘प्रधानमन्त्री सही भयो भने सबै सही हुन्छ । म भन्ने गर्छु, सही व्यक्ति सही समयमा सही ठाउँमा हुनुपर्छ । सही प्रधानमन्त्री भयो भने मात्र सबै कुरा ठिक हुन्छ, यसको लागि भिजन भएको युवालाई चुन्नुहोला ।’
उनले आफ्नो उज्यालो नेपाल अभियान मात्र बत्तिको उज्यालो बाल्ने नभएको पनि प्रष्ट पारे । उज्यालो नेपाल अभियान मनभित्रको उज्यालो, शिक्षाको उज्यालो, सुशासन र भ्रष्टचारमुक्त उज्यालो देशको अभियान भएको मन्त्री घिसिङको भनाई थियो । कार्यक्रममा मन्त्री घिसिङलाई ३३ केभिए हाइटेन्सनबाट पीडित संघर्ष समितिले ज्ञापन पत्र पनि बुझाएको थियो । साथै, मन्त्री घिसिङले शिलान्यास गरेको गुम्बाको भवनको प्रस्तावना पत्र पनि गुम्बाकोतर्फबाट बुझाइएको थियो ।
भिडियो:
