_1704867435.jpeg)
धरान: धरान १३ स्थित कृषि उपज बजारस्थलमा मिनि कोल्ड च्याम्बर निर्माण भइहेको छ । प्रदेश १ सरकारको भुमी व्यवस्था, कृषि तथा सहकारी मन्त्रालयको सहयोगमा यो च्याम्बर निर्माण भइरहेको हो ।
यो च्याम्बरको क्षमता ७५ टन रहेको छ । फलफुल र तरकारीलाई लक्षित गरेर च्याम्बर निर्माण भइरहेको कृषि उपज बजारस्थलका व्यवस्थापक लक्ष्मण भट्टराईले जानकारी दिए । तत्काल बिक्री हुन नसकेको तर चाडै कुहिने तरकारी, फलफुलहरुलाई कोल्ड च्याम्बरमा राखेर ताजापन ह्रास हुन नदिइने र केही दिन वा महिनापछि पनि राम्रो मुल्यमा बिक्री गर्न सकिने उनले बताए । ‘काउली, टमटर तत्काल बिक्री भएन भने कोल्ड च्याम्बरमा राखेर भोली, पर्सिको दिन बेच्न सकिन्छ,’उनले भने,‘सुन्तला ३ महिनासम्म राख्दा पनि गुणस्तरमा ह्रास नआउने रहेछ । स्याउ, नासपतिलाई त १ बर्षसम्म नै राख्न मिल्ने रहेछ ।’
कोल्ड च्याम्बरले तरकारी र फलफुललाई राम्रो बजारीकरण गर्न मद्दत पुग्नेछ भने उपभोक्ताहरुले पनि अफसिजनमा पनि ताजारुपमा नै फलफुल उपभोग गर्न पाउनेछन् । यस्तै, किसान तथा व्यापारीहरुको चाडै कुहिने तरकारी वा फलफुल यहाँ ताजारुपमा नै राखिने भएकोले क्षति पनि हुनेछैन । ‘सिधुवामा किसानहरुले थोरै क्षमताको कोल्ड च्याम्बर राखेको छ भन्ने सुनेको छौं, त्यो बाहेक प्रदेश १ मा अन्यत्र सहरमा यस्तो च्याम्बर छैन,’व्यवस्थापक भट्टराईले भने,‘हामी यसलाई उच्चतम उपयोग गर्ने योजनामा छौं ।’
कृषि बजारका अनुसार आगामी बर्ष संघीय सरकारबाट पनि डेढ सय मेट्रिक टन क्षमताको कोल्ड च्याम्बर थपिदैछ । कृषि उपज सञ्चालक समितिको प्रस्तावलाई संघीय मन्त्रालयले स्वीकृति गरेको र बजेट छुट्टीएको प्रारम्भिक जानकारी आएको छ, तर औपचारिकरुपमा जानकारी आउन भने बाँकी छ । ‘यो दुवै च्याम्बरलाई पाइलट प्रोजेक्टकोरुपमा पनि लिएका छौं । यो सफल भयो भने नगरपालिकासँग मिलेर कुनै ठाउँमा कोल्ड स्टोर नै बनाउछौं,’व्यवस्थापक भट्टराईले भने,‘कोल्ड स्टोरलाई त ठुलो क्षेत्रफल चाहिन्छ, र लगानी पनि कम्तीमा १५ करोड पर्छ ।’ अहिले निर्माण भइरहेको कोल्ड च्याम्बर कृषि उपजको पशु हाटको दक्षिणको जग्गामा हो । यसको कुल लागत ७५ लाख रहेको छ । मेशिनको मात्र ५० लाख लागत परेको कृषि बजारले जानकारी दिएको छ । अर्को बर्ष थप डेढ सय मेट्रिक टनको कोल्ड च्याम्बर निर्माण हुनेछ ।
