धरानमा खानेपानी विवाद: समायोजन गर्न नहुने भन्दै संस्थान कार्यालयमा घेराउ (भिडियोसहित)

धरान: धरानमा एडिबिको ऋण तथा अनुदानमा सञ्चालित खानेपानी परियोजना असफल भएको दाबी गर्दै खानेपानी संस्थानलाई मर्ज नगर्न माग गर्दे आज पनि धरानमा प्रर्दशन भएको छ ।

धरान खानेपानी संस्थान बचाउ सर्वदलीय सर्वपक्षीय संघर्ष समितिले धरान १३ स्थित खानेपानी संस्थान कार्यालयमा घेराउ गरेको हो । यो समितिमा धरानका विभिन्न राजनीतिक दल, संघसंस्थाहरु आवद्ध छन् । उनीहरुले खानेपानी परियोजना असफल भएकोले संघीय सरकारलाई नै जिम्मा दिन माग गरेका छन् । परियोजनासँगै खानेपानी संस्थानलाई खानेपानी व्यवस्थापन बोर्डमा मर्ज नगर्न माग गर्दै समितिले त्यसो गरिए कडा आन्दोलन गर्ने चेतावनी पनि दिएको छ ।

धरानमा खानेपानी परियोजना शुरु भएदेखि नै चर्को विवाद भइरहेको छ । परियोजनाको म्याद सकिए पनि अझै पानी वितरण हुन सकेको छैन । अहिले रेल्वे सिस्टमबाट वडा १७ र ११ का केही भाग र पिण्डेश्वर सिस्टमबाट वडा १५ मा पानी वितरण भइरहेको छ । तर, ती वडालाई पनि पर्याप्त पानी वितरण हुन नसकेको विरोधी पक्षको दाबी छ । ‘२ वडालाई त राम्रो पानी खुवाउन सकेको छैन, यो असफल भैसकेको परियोजना जिम्मा लिनु हुन्न,’आन्दोलनरत पक्षमा रहेका संघीय लिम्बुवान मञ्चका जिल्ला अध्यक्ष अमर इजमले भने,‘जर्बजस्ती गरिए कडा आन्दोलन हुन्छ ।’

पछिल्लो समय साउन १० गतेको नगरसभामा आयोजना र संस्थान दुवै खानेपानी व्यवस्थापन बोर्डमा समायोजन गर्ने प्रस्ताव भएपछि खानेपानी विवाद थप चर्किएको हो । अहिले दिनहुँजसो धरानमा खानेपानीको बिषयमा प्रर्दशन भइरहेकोछ । खानेपानी आयोजना असफल भइसकेको कारण खानेपानी संस्थानलाई मर्ज(समायोजन) गर्न नहुने पक्षले प्रर्दशन गरेको हो । हिजो(मंगलबार) पनि धरान उपमहानगरपालिका घेराउ गरिएको थियो ।