विश्वव्यापी अनलाइन यलम्बर संगीत प्रतियोगिताको अडिसन शुरु (भिडियोसहित)

  • प्रकाशित: आश्विन ११, २०७७ / 349 पटक पढिएको
  • क्लिक धरान
alt

धरान: साँस्कृतिक जागरण गर्ने उद्देश्यले ‘विश्वव्यापी अनलाइन यलम्बर संगित प्रतियोगिता’को अडिसन शुरु भएको छ ।

किरात राई साँस्कृतिक कलाकार संघको आयोजनामा छैठौं संस्करणको प्रतियोगिता शुरु भएको हो । प्रत्येक वर्षको जेठ २२ गते संघले आफ्नो स्थापना दिवसको अवसरमा प्रतियोगिता आयोजना गदै आएको छ । तर, यस बर्ष विश्वव्यापी महामारीको रुपमा फैलिरहेको कोभिड १९ का कारण अनलाइनमार्फत प्रतियोगिताको आयोजना गर्न लागिएको हो । प्रतियोगिताको अनलाइन अडिसन गत भदौं २७ गते देखी खुला गरिएको संघका अध्यक्ष रामकर राईले बताए । ‘संस्थाको स्थापना दिवसको अवसरमा प्रत्येक वर्ष यलम्बर संगीत प्रतियोगिता आयोजना गदै आएका थियौं । तर, यो वर्ष कोरोना महामारीका कारणले अनलाइनमार्फत प्रतियोगिताको आयोजना गर्न लागेका छौं,’संघका अध्यक्ष राईले भने,‘पहिलो अडिसन गत भदौं २७ गतेबाट खुला गरेका छौं । खुला प्रतिस्पर्धा हो । विश्वको जुनसुकै ठाउँबाट प्रतियोगिले भाग लिन सक्नुहुनेछ ।’

उनका अनुसार आउदो असोज १६ गतेभित्र अडिसनमा भाग लिइसक्नु पर्नेछ । प्रतियोगितामा सबै उमेर समुहका किरात राई समुदायले भाग लिन पाउने उनले बताए । उनले प्रतियोगितामा किराती मौलिक जागरणका गीत मात्र गाउन पाउने अध्यक्ष राईको भनाई छ । ‘प्रतियोगीले किराती मौलिक जागरणका गीत गाएको भिडियो रेकर्ड गरेर पठाउनुपर्ने छ,’संघका अध्यक्ष राईले भने,‘प्रतियोगितामा सबै उमेर समुहका किरात राई समुदायले भाग लिन पाउनेछ । गाउँदा माइक्रोफोनको प्रयोग गर्न पाइने छैन ।’ प्रतियोगीले आफुले गाएको गीतको भिडियो संघको आधिकारिक इमेल ठेगाना [email protected] मा पठाउनुपर्ने संघका सचिब सुरज मेवाहाङ राईले बताए ।

प्रतियोगितामा अडिसन राउण्डदेखि फाइनल राउण्डसम्म प्रतियोगीले चार वटा प्रस्तुती दिनुपर्ने र अन्य राउण्डहरुमा आयोजकले दिएको गीत पनि गाउनुपर्ने उनले बताए । उनका अनुसार पहिलो अडिसनबाट टप ३० छनौट गरिने छ । यस्तै, दोस्रो चरणका लागि टप २० छनौंट हुदै फाइनल चरणका लागि अन्तिम १० छनौट गरिने आयोजकले जनाएको छ । प्रतियोगिताको विजेताले नगद ३० हजार रुपैयाँसहित ट्रफी हात पार्ने आयोजकले जनाएको छ ।

यस्तै, प्रतियोगिताको दोस्रो र तेस्रो विजेताले क्रमसः नगद १५ हजार र तेस्रोले नगद १० हजार रुपैयाँसहित ट्रफी पाउने छन् । यस्तै, टप १० प्रतिस्पर्धीहरुको भिडियो लाइकको आधारमा सबै भन्दा धेरै लाइक पाउनेलाई ‘स्रोता छनौंट’ विजेता घोषणा गरी नगद ५ हजार रुपैयाँ प्रदान गरिने आयोजकले जनाएको छ । प्रतियोगिताको फाइनल आगामी कार्तिक दोस्रो साता हुने आयोजकले जनाएको छ ।

अध्यक्ष: सबिता राई || प्रधान सम्पादक: आर.के.राई || प्रबन्ध निर्देशक: सुनिता केसी राई || फाेटाे सम्पादक: विकास चाम्लिङ

Click Dharan Media (P) Ltd. || फोन: ९८१४३२३६४६ || इमेल: [email protected]

कम्पनी दर्ता नं. २३६५०० || स्थायी लेखा नं.: N/A || प्रेस काउन्सिल नेपाल: N/A || सुचना तथा प्रसारण विभाग: N/A

प्रतिलिपि अधिकार © 2020 / 2020 - क्लिक धरान - सर्वाधिकार सुरक्षित