अप्रेसन पछि मृत्यु भएकी दिपा राईको आज पोष्टमार्टम र अन्त्येष्टी

  • प्रकाशित: माघ ९, २०७७ / 2,510 पटक पढिएको
  • क्लिक धरान
alt

धरान: विजयपुर हस्पिटल र मृतक पक्षबीच सहमति भएपछि इटहरीकी दीपा राईको मृत्यु भएको ४ दिनपछि आज शवको पोष्टमार्टम भएको छ ।

वीपी कोइराला स्वास्थ्य विज्ञान प्रतिष्ठानको शवगृहमा मृतक राईको शवको आज पोष्टमार्टम भएको हो । पोष्टमार्टम भइसकेको र उनको अन्तिम दाह सँस्कार गर्ने तयारी भइरहेको मृतक पक्षका के.के.राईले जानकारी दिए । उनले भने,‘पोष्टमार्टम भइसक्यो, अब तरहरा पानीपियामा अन्त्येष्टी हुन्छ ।’ राईको शवलाई जातीय सँस्कार अनुसार पानीपिया क्षेत्रमा गाडिनेछ ।

मृतक राईलाई न्याय दिलाउनुपर्ने भन्दै हिजो मृतक पक्षले हस्पिटल अघि सडकमा दिनभर जसो धर्ना दिएका थिए । उनीहरुले दिउँसो करिब १ बजेदेखि ५ बजेसम्म पुतलीलाइन सडक अवरुद्ध पारेका थिए । हस्पिटल प्रशासन र मृतक पक्षबीच हिजो नै समझदारी बनेको थियो । उक्त समझदारीलाई आज अन्तिम रुप दिइएको केके राईले जानकारी दिए । आज इटहरी वडा नं २० का अध्यक्ष मणीराम श्रेष्ठ, किरात राई यायोक्खाका प्रतिनिधि, मृतकको परिवारका सदस्यहरुको उपस्थितिमा सहमति भएको हो । तर, सहमति लिखित भने नगरिएको राईले जानकारी दिए ।

सहमति अनुसार मृतक राईको १५ महिनाको छोरीलाई स्नातक तहसम्मको शिक्षाको जिम्मेवारी हस्पिटलले लिनेछ भने हस्पिटल रहेसम्म स्वास्थ्य उपचार पनि दिनेछ । मृतकका श्रीमान्ले अप्रेसन गर्ने डाक्टर गजेन्द्रप्रसाद दासविरुद्ध प्रहरीमा उजुरी दर्ता गरिसकेको कारण सहमति लिखित नभएको हो । हस्पिटल सञ्चालकले मानवीयता पक्षलाई हेरेर छोरीको शिक्षा र स्वास्थ्यमा सहयोग गर्ने सहमति जनाएको बताइएको छ ।

धरान १०, पुतलीलाइनस्थित हस्पिटलमा सोमबार पित्तथैलीमा भएको पत्थरीको अप्रेसन भएको थियो । तर, अप्रेसन पछि उनको शरीरभित्र निरन्तर रक्तस्राव भएपछि डाक्टर दासले वीपी प्रतिष्ठानमा रिफर गरेका थिए । प्रतिष्ठानमा उनको अप्रेसन गर्न नपाई मृत्यु भएपछि श्रीमान राजेन्द्र राईले डाक्टरले अप्रेसनमा लापरवाही गरेको र अन्तिम समयमा मात्र रिफर गरेको भन्दै डाक्टरविरुद्ध कारबाही र क्षतिपूर्तिको माग राख्दै धरान प्रहरीमा जाहेरी दिएका छन् ।

छुटाउनुभयो कि ?

अध्यक्ष: सबिता राई || प्रधान सम्पादक: आर.के.राई || प्रबन्ध निर्देशक: सुनिता केसी राई || फाेटाे सम्पादक: विकास चाम्लिङ

Click Dharan Media (P) Ltd. || फोन: ९८१४३२३६४६ || इमेल: [email protected]

कम्पनी दर्ता नं. २३६५०० || स्थायी लेखा नं.: N/A || प्रेस काउन्सिल नेपाल: N/A || सुचना तथा प्रसारण विभाग: N/A

प्रतिलिपि अधिकार © 2020 / 2021 - क्लिक धरान - सर्वाधिकार सुरक्षित