_1704867435.jpeg)
धरान: वीपी कोइराला स्वास्थ्य विज्ञान प्रतिष्ठान धरानको समस्या समाधान गर्न सरकारले प्रधानमन्त्री कार्यालयका वरिष्ठ सचिव बैकुण्ठ अर्याल संयोजक रहेको एक जाँचबुझ समिति गठन गरेको छ ।
प्रधानमन्त्री एवं कुलपति कार्यालयले हिजो बिहिबार सचिव अर्यालको अध्यक्षतामा जाँचबुझ समिति गठन गरेको हो । प्रधानमन्त्री कार्यालयका एक उपसचिवका अनुसार प्रधानमन्त्री केपी शर्मा ओलीकै पालामा जाँझबुझ समिति गठनको फाइल अघि बढेको थियो । तर, असार २८ गते सर्वोच्चको संवैधानिक इजलाशको फैसला आउने भएपछि समिति गठन हुन सकेको थिएन । सोही फाइल कार्यान्वयन गर्ने क्रममा बिहिबार समिति गठन भएको नाम उल्लेख नगर्न आग्रह गर्दै ती उपसचिवले जानकारी दिए । मोवाइल सम्पर्कमा उनले भने, 'वरिष्ठ सचिव वैकुण्ठ अर्यालको संयोजकत्वमा समिति बनेको छ ।' उनले आज कार्यालय पुगेर मात्र औपचारिकरुपमा जानकारी दिन सक्ने पनि बताए ।
यो समिति ८ सदस्यीय भएको बताइएको छ । समितिलाई १५ दिनभित्र प्रतिवेदन पेश गर्न समय दिइएको छ । संयुक्त संघर्ष समितिका सहसंयोजक डा.विष्णु पोखरेलले समिति गठन भएको चर्चा सुनेपनि औपचारिकरुपमा जानकारी नआएको बताए । यद्यपी उनले प्रधानमन्त्री कार्यालयका उच्चअधिकारीले सम्पर्क गरेर आफुहरुको मागबारे जानकारी लिएको बताए । उनले भने,'समिति गठनको कुरा सुन्यौ तर औपचारिक त्यस्तो जानकारी पाएका छैनौं, हाम्रो आन्दोलनको कार्यक्रम जारी छ । '
प्रतिष्ठानमा चिकित्सक, विद्यार्थी, कर्मचारी तथा नर्सिंगहरुले आन्दोलन थालेको एक महिना बितिसकेको छ । प्रतिष्ठानको बेथिती, आर्थिक अनियमितता एवं भ्रष्टचार अन्त्यको लागि जारी आन्दोलनको क्रममा असार १५ गते वार्ता भाँडिएको थियो । वार्ताको क्रममा उपकुलपतिले मदिरा पिएर आएको भन्दै वार्ता भाडिएको भोलीपल्ट चारै जना पदाधिकारीको कार्यकक्षमा तालाबन्दी गरिएको थियो ।
त्यसयता, उपकुलपति डा.ज्ञानेन्द्र गिरीले २ पटक वार्ताको आह्वान गरेपनि कुलपति वा सहकुलपतिस्तरबाट गठन भएको उच्चस्तरीय समितिसँग मात्रै वार्ता गर्ने भन्दै आन्दोनलकारीले अस्वीकार गर्दै आएको छ । संयुक्त संघर्ष समितिले बुधबार प्रधानमन्त्री शेरबहादुर देउवालाई पत्र पठाउदै ४८ घण्टाभित्र माग पुरा नभए आजदेखि दैनिक २ घण्टा इर्मजेन्सी, कोभिड अस्पताल र पुर्वनिर्धारित परीक्षाबाहेक सबै सेवा बहिष्कारको अल्टिमेटम दिएका थिए ।
