_1704867435.jpeg)
धरान: धरान १४ विजयपुरस्थित दन्तकाली मन्दिरमा वडा दशैंको फुलपाती भित्र्याइएको छ ।
हर्कबढाईकासाथ आज मंगलबार दिउँसो साइतमा फुलपाती भित्र्याइएको हो । फुलपाती भित्र्याउन मन्दिरबाट बाजासहितको टोली पिण्डेश्दर मन्दिरतर्फ गएको थियो । त्यहाँबाट ३ जना पुजारीले खोजेर संकलन गरेको ९ प्रकारका वनस्पति (नवपत्रिका)लाई विधिपुर्वक डोलीमा राखेर दन्तकालीमा ल्याएर भित्र्याइएको मुल पुजारी विश्वराज खनालले जानकारी दिए । यही विधिलाई फुलपाती भित्र्याउने भनिएको उनले बताए ।
नवपत्रिका खोजी गर्न बिहानै ३ जना पुजारी पिण्डेश्वर क्षेत्रमा गएका थिए । फुलपाती भित्र्याउदा घर घरबाट स्थानीयले फुलपाती पनि डोलीमा चढाउने गर्छन् । मन्दिरमा भित्र्याइसकेपछि पुजा गरिने र दशमीको दिन अपराजिताको पुजा सकेपछि विर्सजन गरिने मुल पुजारी खनालले जानकारी दिए । फुलपाती विर्सजन भएपछि मात्र मन्दिरको मुलढोका खोलिने र सर्वसाधारणहरुले दर्शन गर्न पाउने उनले बताए । फुलपाती भित्र्याउन धरानका मेयर तिलक राईसहित जनप्रतिनिधिहरु, नेपाल प्रहरी, सशस्त्र प्रहरी र नगर प्रहरीको पनि सहभागिता रहेको थियो ।
