_1704867435.jpeg)
धरानः स्वर्गीय सुवास राई स्मृति सुपर ८ लिग फुटबल प्रतियोगितामा धरानको वडा नं. १५ अंक तालिकाको शीषस्थानमा रहेको छ ।
धरान १६ स्थित रंगशालामा आज (शुक्रबार) विहान वडा नं १४ लाई १–० गोल अन्तरले पराजित गर्दै ३ अंक जोडेपछि वडा नं १५ अंक तालिकाको शीर्षस्थानमा उक्लिएको हो । वडा नं १५ ले दुई खेल खेलेर दुवैमा जित हासिल गर्दै ६ अंक बटुलेको छ । आज भएको खेलमा वडा नं १५ लागी एक मात्र गोल मदन लाबुङले गरेका थिए । खेलको म्यान अफ द म्याच धरान–१५ का आशुतोष राई घोषित भएका छन् । उनले नगद २५ सय पुरस्कार हात पारे ।
भोली शनिबार दिउसो ४ बजे समुह बी मा रहेका धरान–१३ र धरान ८ का बीच खेल हुनेछ । भोलीको खेल पछि दोस्रो चरणका खेलहरु सकिनेछ । यसअघि १३ र ८ नं. वडाले एक एक खेल जित्दै समान ३ अंक सहित समुहको शिर्ष स्थानमा छन् । सुपर ८ लिगमा गोधुली रनिङ कपका उत्कृष्ट ८ टिम सहभागी छन् ।
प्रतियोगितामा सहभागी ८ टिमलाई दुई समुहमा विभाजन गरी लिगकम नकआउटका आधारमा प्रतियोगिता भइरहेको छ । समुह विजेता र उपविजेता प्रतियोगिताको सेमिफाइनलमा पुग्नेछन् । सेमिफाइनलमा विजेता टिमहरुले फाइनलमा प्रतिष्पर्धा गर्नेछन् । फागुन २८ गते सुरु भएको प्रतियोगिताको फाइनल चैत्र १२ गते हुनेछ । प्रतियोगताको विजेताले २ लाख र उपविजेताले १ लाख नगद पुरस्कार प्राप्त गर्नेछन् ।
