_1704867435.jpeg)
धरान: करिब ३ महिना पछि आज (सोमबार) धरानको कार्यपालिका बैठक सौहार्दपुर्ण वातावरणमा सम्पन्न भएको छ ।
गत असोज १३ गते भाँडिएको बैठक त्यसपछि पनि लगातार ३ पटक आह्वान भएर पनि बस्न सकेको थिएन । मेयर हर्क साम्पाङ र वडाअध्यक्ष तथा कार्यपालिका सदस्यहरुबीच सम्बन्ध चिसिदै जादा समग्र धरानको विकासमा दुरगामी असर पर्ने भन्दै चिन्तासमेत प्रकट हुन थालिसकेको थियो । तर, आइतबार साँझ उपमेयर अइन्द्रबिक्रम बेघाको समन्वयमा मेयर साम्पाङ र राजनीतिक दलको प्रतिनिधित्व हुने गरि वडा १५ र १८ का अध्यक्षसहित संवाद भएपछि बैठक बस्ने वातावरण बनेको थियो ।
आजको बैठकमा एजेण्डामा प्रवेश गर्नुअघि मेयर साम्पाङ, उपमेयर बेघा र वडाअध्यक्षहरु वडा १५ का नरेश इवारम, वडा १८ का नरेन्द्रकुमार राई (प्रविण) र वडा १७ का सुर्यबहादुर भट्टराई (मनोज)ले क्रमशः सम्बोधन गरेका थिए । हिजो संवादको क्रममा भएको समझदारी अनुसार नै बैठकमा एजेण्डा प्रस्तुत हुनुअघि सम्बोधन गर्ने तय गरिएको थियो ।
शुरुमा मेयर साम्पाङले सम्बोधन गर्दै कार्यपालिका बैठक स्थानीय सरकारको सदन पनि भएकोले विभिन्न कुराहरु उठ्ने र त्यसमा सहमति, असहमति हुनसक्ने भन्दै त्यसक्रममा विगतमा सबैबाट नहुनुपर्ने गल्ती भएको बताए । उनले आउने दिनमा त्यस खालको गल्ती नहुने गरि सबै सच्चिएर अघि बढ्न आग्रह गर्दै बैठक सुचारु गरेर सम्पन्न गर्न आह्वान गरेपछि वडाअध्यक्ष र कार्यपालिका सदस्यहरुले टेवल ठटाएर समर्थन जनाएका थिए ।
मेयर पछि सम्बोधन गर्दे उपमेयर बेघाले पनि विगतलाई बिर्सेर नयाँ ढंगले अघि बढ्न, विगतको कमीकमजोरीलाई सच्याउदै पाठ सिकेर अघि बढ्नुपर्ने बताए । आफ्नो गतिविधि, कामकारबाहीले कसैलाई असर परेमा, अफठेरो परेमा कम्तीमा अपसी समझदारीमा बसेर व्यवस्थापन गर्दै लैजान पनि उनले सबैलाई आग्रह गरेका थिए । ‘बिषय बस्तुलाई तन्काएर लैजादा नगरलाई र हामीलाई पनि अफठेरो पर्नसक्छ । सबै कुराको सामुहिक दायित्व र जिम्मेवारी बोध गरेर लैजानुपर्छ,’ उनले भने,‘कार्यपालिका बैठकलाई व्यवस्थित र विधिसम्मतढंगले लैजानुपर्छ, त्यसको लागि सबैले जिम्मेवारी वहन गर्नुपर्छ । त्यही नै हाम्रो निष्कर्ष हो, समझदारी हो ।’
उनले सबै जनताको मुद्दालाई नै सहजीकरण गरेर व्यवस्थापन गर्न निवार्चित भएर आएको भन्दै मेयर, उपमेयर, वडाअध्यक्ष, कार्यपालिका सदस्य सबैको भुमिका जोडेर मात्र कार्यपालिका र समग्र नगरको भुमिका हुने पनि बताए । कुनै बिषयलाई धेरै नतन्काउन सबै सचेत रहनुपर्ने भन्दै उपमेयर बेघाले कसैले वडाअध्यक्षहरुलाई र कसैले मेयरलाई उकास्ने काम नगर्न पनि आह्वान गरे ।
वडा नं १५ का अध्यक्ष नरेश इवारमले पनि सबै जनप्रतिनिधिहरु धरानको विकास गर्न आएकोले एकतावद्ध भएर अघि बढ्ने र त्यसको शुरुवात भएको भन्दै खुशी व्यक्त गरे । ‘हामी ५ बर्षको लागि जनताको म्याण्डेट लिएर आएका छौं । हामी सकरात्मक पक्षले अगाडि बढ्नुपर्छ । नयाँ शुरुवात हुदैन, एकताको साथ अघि बढ्नेछौं,’उनले भने ।
वडा नं १८ का अध्यक्ष नरेन्द्रकुमार राई (प्रविण)ले आइतबार साँझ भएको संवादमा सबैभन्दा बढी मेयर खुशी भएको खुलाउदै बैठक सुचारु हुँदा अत्यन्तै खुशी लागेको बताए । उनले भने, ‘सम्पुर्ण कार्यपालिका सदस्यहरुबाट राम्रो काममा साथ, सहयोग रहनेछ । धरानको विकासमा साथ, सहयोग हुन्छ,’उनले भने ।
वडा नं १७ का अध्यक्ष सुर्यबहादुर भट्टराई (मनोज)ले उपमेयर बेघाले समन्वयकारी भुमिका निर्वाह गरेकोमा बिशेष धन्यवाद दिदै सहअस्तित्व, सहकार्य, सहमति र सद्भावले एकता पैदा गर्ने भएकोले सबैले यसतर्फ ध्यान दिनुपर्ने बताए । बैठकमा व्यक्तिगत घरायसी झगडा र लेनदेनको छलफल नहुने भन्दै उनले धरानको समग्र विकास र समृद्धिको लागि नै छलफल हुने बताए । तर, छलफल त्यो ढंगले हुन नसकिरहेको भन्दै अध्यक्ष भट्टराईले मिडियाले पनि धरानलाई एकतावद्ध गराउने गरि भुमिका निर्वाह गर्न आग्रह गरे । ‘अहिलेको जस्तो एकता र सद्भाव स्थायीत्व होस् । हामीले एकले अर्कालाई मन पराए पनि मन नपराए पनि ५ बर्षसम्म एकअर्काको परिपुरक हौं, यो कुराको हेक्का रह्यो भने सहमति र सहअस्तित्वतिर नै लैजान्छ,’उनले भने ।
भिडियो:
