_1704867435.jpeg)
धरान: भुपु लाहुरेहरुको सहर भनेर परिचित यो सहरको नाम किन धरान राखियो भन्नेबारे धेरैलाई थाह नहुनसक्छ । बाहिरका मात्र होइन, धरानकै पछिल्लो पुस्ता पनि अनभिज्ञ छन् ।
थुप्रै सहरहरुले आफ्नो इतिहास र पहिचन झल्काउने प्रतिमाहरु मुख्य चोकमा राख्ने गरेका छन् । धरानको मुख्य बजार वा चोकमा भानुभक्तको मुर्ति छ भने हङकङको नक्कल गरेर बनाइएको घण्टाघर ठडिएको छ । यी दुवैले धरानको वास्तविक तथा मौलिक पहिचान र इतिहास बोल्दैन ।
काठ चिर्ने आरावालाहरुले तयार गर्ने धरान (धराप)बाट पुर्वको आधुनिक सहर धरान नामकरण भएको मानिन्छ । घना जंगलकोरुपमा रहेको स्थानमा फडानी गर्ने क्रममा काठ चिर्ने आरावालाहरुले धरान (धराप) तयार गर्थे । धरानको शिर रहेको विजयपुरमा मात्र मानव बसोबास थियो । उनीहरु काठ चिर्न आउने ठाउँ धरान (धराप) भएकोले फडानी भएको ठाउँको नाम धरान रहन गएको र अहिलेको आधुनिक धरान भएको हो ।
यो इतिहास झल्कने गरि धरानको वडा नं २० स्थित श्रम सँस्कृति पार्कमा धरानको प्रतिमा राखिने भएको छ । धरानको प्रतिमा मुर्तिकार तथा कलाकार रोजन राईले निर्माण गरिसकेका छन् । उनले तयार गरेको मुर्ति मंगलबार श्रम सँस्कृति पार्कमा पुर्याइएको छ । अब फिनिसिङ गर्न एक साताको समय लाग्ने र सम्पुर्णरुपमा तयार भएपछि उद्घाटन गरिने कलाकार राईले बताए ।
मुर्ति तयार गर्न धरान उपमहानगरपालिकाबाट करिब ९ लाख बजेट छ भने मुर्ति बनाउदा १५ लाख बढी खर्च भइसकेको पनि कलाकार राईले बताए । राम्रो काम होस् भनेर उपमहानगरपालिकाबाट प्राप्त हुने रकमभन्दा बढी खर्च गरेर मुर्ति निर्माण गरिदिएको कलाकार राईले बताए । उनले भने,‘९ लाखभन्दा धेरै नै खर्च भइसकेको छ । यति राम्रो काम भइरहेकोले मेरो तर्फबाट पनि श्रमदान नै गरिदिएको छुँ ।’
मेयर हर्क साम्पाङको अगुवाईमा वृहत वृक्षरोपण गरेर नामकरण गरेको श्रम सँस्कृति पार्क पछिल्लो समय पर्यटकीय गन्तव्य बन्दै गएको छ । धरान र बाहिरबाट पनि थुप्रै मानिसहरु श्रम सँस्कृति पार्क हेर्न आउने गरेका छन् । त्यहाँ गत बर्ष रोपिएको विरुवाहरु हुर्कदै गएका छन् । त्यही क्षेत्रमा घुम्न आउनेहरुलाई थप आकर्षणको लागि धरान मुर्ति स्थापना गरिएको हो । मेयर साम्पाङले धरानको पहिचान झल्कने गरि निर्माण गरिएको मुर्तिले पर्यटकहरुलाई थप आकर्षित गर्ने बताए । श्रम सँस्कृति पार्क हुदै ऐतिहासिक साँगुरीगढी जाने पुरानो बाटोमा पदमार्ग निर्माण कार्य पनि भइरहेको छ भने पिस गोर्खा फाउण्डेशन र हर्क साम्पाङ सपोर्ट कमिटी युकेले निर्माण गरिदिएको निशाने खानेपानी ट्यांकी हेर्न पनि धेरै मानिसहरु आउने गरेका छन् ।
भिडियो:भिडियो:
भिडियो:
