_1704867435.jpeg)
धरान: जुनियर मिस्टर एण्ड मिस धरान आइडल सिजन १ को उपाधि प्रसंशा लिम्बु र अजय राउतले जितेका छन् ।
शुक्रवार धरान १८ स्थित विपी कोइराला स्वास्थ्य विज्ञान प्रतिष्ठानको दहसेरा हलमा सम्पन्न भएको प्रतियोगितामा उनीहरु विजयी भएका हुन् । उपाधि विजेता प्रसंशा र अजयले जनही नगद २५ हजार, प्रमाणपत्र, ट्रफि र अन्य विभिन्न उपहार प्राप्त गरेका छन् ।
प्रतियोगितामा छात्रातर्फ वाङ्छ्या राई दोस्रो र जस्मिन राई तेस्रो भइन् । छात्र तर्फ नेमार तामाङ दोस्रो र रोमन खड्की तेस्रो भए । उनीहरुले क्रमशः नगद १५ हजार र १० हजार सहित प्रमाणपत्र, ट्रफि र अन्य विभिन्न उपहार पाएका छन् ।
प्रतियोगिता धरान ६ पानवारीका ५ बर्षीय अङ्कित खड्काको उपचार सहयोगार्थ होप धरानद्वारा आयोजना गरिएको हो । प्रतियोगिताको ग्राण्ड फिनाले कार्यक्रममा मिस्टर नेपाल २०२४ का उपविजेता आदेश प्रधान प्रमुख निर्णायक रहेका थिए भने मिस ग्याम नेपाल २०१८ का विजेता शान्ति पाख्रिन, मिस टुरिजम नेपाल २०२४ का विजेता रविना बराईली, सामाजिक अभियनता सोनिया गुप्ता चौधरी र मिस ट्यालेट ओर्गनाइज चोइज विजेता रिया विश्वकर्मा निर्णायकमा रहेका थिए।
कार्यक्रमको उद्घाटन समारोहमा धरानका नगर प्रमुख हर्क राज राई (साम्पाङ) प्रमुख अतिथि रहेका थिए । प्रतियोगितामा छात्रतर्फ १० जना र छात्रा तर्फ २० जना सहभागी रहेका थिए । कार्यक्रम मिस्टर एण्ड मिस धरान एसईई २०२५ सिजन २ का उपविजेता अन्जली साह, रङ्छिङ तामाङ र स्यामरिन बास्तोलाले संचालन गरेका थिए।
