_1704867435.jpeg)
धरान: ‘स्कूल डान्स आइडल २०८२’ नृत्य प्रतियोगिता आगामी पुस १४ गते धरानमा हुने भएको छ।
युनाइटेड डान्स एकेडेमी धरानको नवौं संस्करण अन्तर्गत हुन लागेको प्रतियोगिताको विजेतालाई एकलाख पुरस्कार सहित ट्रफी दिइने आयोजकले जनाएको छ । प्रतियोगितामा धरानका ४४ वटा विद्यालयका ५ हजार ३ सय ३५ विद्यार्थीहरू सहभागी भएका थिए । जेठ २६ गतेबाट सुरू प्रतियोगितामा हाल उत्कृष्ट १० जना विद्यार्थीहरु छानिएका छन् ।
टप १० प्रतिस्पर्धीहरुबीचमा आगामी पुस १४ गते अन्तिम प्रतिस्पर्धा अर्थात ग्राण्ड फिनाले हुने युनाइटेड डान्स एकेडेमी धरान ९ का अध्यक्ष सन्तोष तामाङले जानकारी दिए ।
उत्कृष्ट १० मा सियोन स्कूलकी प्रयुसा राई, युनाइटेड गोर्खाकी दिपशीखा राई, होलिल्यान्ड स्कूलका हिमाल तामाङ, शिक्षा सन्देश स्कूलकी आयुष्मा कटवाल, शिक्षा सन्देश स्कूलकी नुयङ्मी राई, भिक्टोरी स्कूलकी टीका मगर, पर्वत स्कूलकी युनिशा राई, सिर्जना स्कूलकी सुनैना सेन्चुरी, विष्णु मेमोरियल स्कूलकी इशा राई र युएन स्कूलकी रुबिना लिम्बू पुग्न सफल भएका छन् ।
आयोजकले पत्रकार सम्मेलन गरेर प्रतियोगिताको ट्रफी समेत सार्वजनिक गरेको छ । अग्रज पत्रकार तथा मजदुर नेता भिमज्वाला राईले ट्रफि सार्वजनिक गरेका थिए । पत्रकार सम्मेलनमा प्रतिष्पर्धी विद्यार्थीहरू, तिनका अभिभावक र अघिल्लो बर्षका विजयीहरु सहभागी थिए । 'कला तपाईंको, मञ्च हाम्रो' नारा रहेको डान्स आइडललाई आगामी बर्ष थप परिष्कृत गर्ने अध्यक्ष तामाङले बताए ।
