_1704867435.jpeg)
धरान: धरान उपमहानगरपालिकाका नगर प्रमुखसमेत रहेका हर्कराज राई (साम्पाङ) नेतृत्वको श्रम सँस्कृति पार्टीले संगठन विस्तारलाई तीब्रता दिएको छ ।
कार्तिक १६ गते निर्वाचन आयोगबाट दल दर्ताको प्रमाणपत्र लिएपछि साम्पाङ नेतृत्वको पार्टीले संगठन विस्तारलाई तीब्रता दिएको हो । उक्त पार्टीको चुनाव चिह्न माटो रहेको छ । दल दर्ताको प्रमाणपत्र लिएको भोलीपल्ट साम्पाङ काठमाण्डौंबाट सिधै मोरङको लेटाङमा पार्टीको कमिटी विस्तार गर्न पुगेका थिए । त्यसयता, पुर्वको विभिन्न जिल्लाहरुमा संगठन विस्तार गर्न पुगिसकेका छन् ।
यो पार्टीले पाँचथर, फिदिम, ताप्लेजुङ, तेह्रथुम र संखुवासभा जिल्लामा आमसभा र पार्टी विस्तार कार्यक्रम सम्पन्न गरिसकेको छ । यस्तै, इलामको माङ्सेबुङ, झापाको दमक र सुनसरीको बराहक्षेत्र नगरको चक्रघट्टीमा पनि (आज मंसिर १७) पार्टी विस्तार तथा सभा सम्पन्न गरिसकेको छ । पार्टी विस्तार तथा सभामा जनलहर देखिएको छ । ठुला भनिएका पुराना दलहरुले राजनीतिक गतिविधि तथा कार्यक्रमहरु गरेर गर्न चुनौती सामना गरिरहेको बेला हर्क साम्पाङ नेतृत्वको पार्टीले भने जिल्ला र नगरहरुमा विशाल आमसभा गरिरहेको छ ।
जनतामा पुराना दलहरुप्रति निराशा भएको र नयाँ वैकल्पिक शक्तिकोरुपमा श्रम सँस्कृति पार्टीमा जनलहर देखापरेको उक्त पार्टीका केन्द्रीय प्रवक्ता अरुण गुरुङ (सत्य)को भनाई छ । इमान्दारिताको जगमा बनेको पार्टी भएकोले जनताले आशा र विश्वास गरेको उनले दाबी गरे । बुधबार बराहक्षेत्रको चक्रघट्टीमा पार्टी विस्तार तथा आमसभामा सहभागी हुन पुगेका गुरुङले भने,‘वैकल्पिक शक्तिकोरुपमा जनताले श्रम सँस्कृति पार्टीलाई लिएको महशुस गरेका छौं । गाउँघरमा समय निकालेर भएपनि जनताको सहभागिता यस्तो विशाल छ ।’
हर्क साम्पाङको निशानामा कुलमान घिसिङ
श्रम सँस्कृति पार्टीका केन्द्रीय अध्यक्ष हर्कराज राई (साम्पाङ)ले जेन जी आन्दोलनको जगमा बनेको सरकारका मन्त्री कुलमान घिसिङविरुद्ध निरन्तर कडा अभिव्यक्ति दिइरहेका छन् ।
उनको पछिल्ला राजनीतिक सभाहरुमा एमसिसिको मुख्य पात्रकोरुपमा घिसिङ भएको भन्दै निशाना साधिरहेका छन् । केही साता अघि इटहरीको तरहरामा पार्टी विस्तारको सभा, दमक र आज चक्रघट्टीमा आयोजित सभामा पनि साम्पाङले घिसिङविरुद्ध अभिव्यक्ति दिए । एमसिसि परियोजना राष्ट्रघाती भएको र उक्त सम्झौता गराउन घिसिङले भुमिका खेलेको भन्दै साम्पाङले देशद्रोहीको संज्ञासमेत दिएका छन् ।
यद्यपी, आइतबार (१४ मंसिर) धरान आएका मन्त्री घिसिङले एमसिसि संसदले आवश्यक छ भनेर पारित गरेको र त्यसमा आफ्नै कुनै हात नरहेको स्पष्ट पारिसकेका छन् । घिसिङले प्रष्टीकरण दिइसकेपनि श्रम सँस्कृति पार्टीका अध्यक्ष साम्पाङले भने संगठन विस्तारको आमसभामा एमसिसिको प्रंसग निकाल्दै घिसिङले राष्ट्रहित विपरीत कार्य गरेको आरोप निरन्तर लगाइरहेका छन् ।
वैकल्पिक शक्तिलाई मिल्न घिसिङको आह्वान, साम्पाङ एक्लै अघि बढ्ने
धरान आएको बेला मन्त्री घिसिङले नयाँ वैकल्पिक शक्तिहरु एकजुट हुन आह्वान गरेका थिए । उनले नाम नलिएपनि हर्क साम्पाङप्रति लक्षित गर्दै देशले परिवर्तन खोजेको बेला नयाँ वैकल्पिक शक्तिहरु एकजुट हुनुपर्नेमा जोडदिएका थिए ।
‘म सबैलाई आह्वान गर्छु, अब एक भएर देशलाई समृद्धितिर अगाडि बढाउन नयाँ भन्ने र वैकल्पिक शक्तिहरु एकअर्कालाई गाली गर्ने होइन, एकजुट भएर अघि बढ्नुपर्छ,’ उनले साम्पाङतर्फ संकेत गर्दै भनेका थिए,‘धरानमा सामाजिक सञ्जालमा विभिन्न किसिमका कुराहरु देखिरहेको छ, त्यसरी एकआपसमा हिलोछ्याप्ने काम नगरौं, एकतावद्ध भएरु अघि बढौं ।’
उज्यालो नेपाल पार्टी समेत दर्ता गराएका घिसिङले धरान आएर सार्वजनिकरुपमा नै सहकार्यको सन्देश दिएपनि साम्पाङसँग भेट हुन भने सकेन । यता साम्पाङले भने कुलमानको सहकार्य र एकताको प्रस्तावलाई ठाडै अस्वीकार मात्र गरेनन्, आगामी चुनावमा कसैसँग पनि गठबन्धन नगरी पार्टीले एक्लै चुनाव लडेर बहुमत ल्याउने दाबी गरे । आज (बुधबार) चक्रघट्टीमा आयोजित सभामा बोल्दै साम्पाङले भने,‘कसैले मलाई कुलमानसँग मिलिदियोस्, फलनासँग मिलोस् नभन्दिनुस् । अनेकपरिमा मुछिएको मान्छेसँग मिलिदियोस् भन्ने अपेक्षा नगर्नु होला ।’
जनतालाई साथमा लिएर हिड्ने तर दलाल, भ्रष्टहरुसँग कुनै हालतमा पनि नमिल्ने साम्पाङको अडान थियो । ‘हामीलाई जनताको साथ छ, हाम्रो साथ जनतासँग छ, तर दलालसँग मिलिदियोस्, भ्रष्टसँग मिलिदियोस्, एमसिसि मतियारसँग मिलिदियोस्, एमसिसि पास गर्ने दलहरुसँग मिल्दियोस् नभन्नुहोला, हामी मिल्दैनौं,’ उनले भने,‘हामी यो देशको माटोसँग मिल्छौं, ढुंगासँग मिल्छौं, यो देशको माटो र ढुंगा मनराउने स्वदेशी मनभएका मानिसहरुसँग मिल्छौं, तर विदेशी प्रभुलाई हजुर भनेर जिउ पाल्ने मान्छेहरुसँग मिल्नुछैन, देश बेच्नेहरुसँग मिल्नुछैन, हामी मिल्दैनौं ।’
उनले एमसिसिको टिप्पणी उठाउने र हस्ताक्षरसमेत गर्ने मानिस कुलमान घिसिङ भकोले विरोध गरेको बताए । ‘किन विरोध गरेको भन्छन्, देशलाई घात गर्ने मेरै बाउ, आमालाई पनि छोड्दिन,’ उनले भने ।
भिडियो:
