_1704867435.jpeg)
धरान: धरान ८ सभागृहमा निर्माण गरिने प्रादेशस्तरको नाटक घर निर्माणको प्रारम्भिक नक्सा तयार भएको छ ।
यो आर्थिक बर्षमा निर्माण शुरु गर्न लागिएको नाटक घरको डिपिआर भने कलाकार बिक्रम श्रीले तयार गर्दैछन् । हाल प्रारम्भिक नक्सा मात्र तयार भएको र लागत अनुमानित ५ करोड रहेको रंगकर्मी नविन मेन्याङ्बोले जानकारी दिए । ‘प्रारम्भिक नक्सा तयार भएको छ, नाटक घर निर्माणको कुल लागत अनुमन ५ करोड रहेको छ,’रंगकर्मी मेन्याङ्बोले भने ।
नाटक घर धरान सभागृहमा निर्माण हुने भएको छ । त्यहाँ करिब २ कट्ठा क्षेत्रफलमा नाटक घर बनाउन उपमहागनगरपालिकाले अनुमति दिइसकेको छ । नाटक घर निर्माणको लागि संघीय सांसद जयकुमार राईले यो आर्थिक बर्षमा ४० लाख बजेट संसद विकास कोषबाट विनियोजन गरिदिएका छन् । आगामी आर्थिक बर्षमा पनि बजेटलाई निरन्तरता दिने प्रतिवद्धता सांसद राईले दिएको रंगकर्मी मेन्याङ्बोले बताए ।
यसबाहेक प्रदेश सरकारलाई पनि नाटक घर निर्माणको लागि अनुरोध गर्ने रंगकर्मीहरुको तयारी छ । यस्तै, विश्वभर छरिएर रहेका रंगकर्मी, कलाकार तथा शुभेच्छुकहरुबाट आर्थिक सहयोग जुटाएर नाटक घर निर्माण गरिने कलाकारहरुको भनाई छ । ‘विभिन्न मुलुकमा रहनुभएका कलाकारहरु एकदमै सकरात्मक हुनुहुन्छ । रंगकर्मी, रंग चिन्तक, रंगमञ्च, साहित्य, कला, सँस्कृतिलाई माया गर्नेहरुबाट जुटाउछौं । हामी पनि थप्छांैं,’मेन्याङ्बोले भने,‘काम शुरु हुनु बित्तिकै संयोजक तोकेर सहयोग संकलनको काम पनि शुरु हुन्छ ।’
नाटक घर स्पेशल नाटक मञ्चन हुने ठाउँ हो । तर, यहाँ नाटकको कार्यक्रम मात्र हुदैन, चित्रकला प्रर्दशनी, कविता गोष्ठीलगायत साहित्यिक गतिविधिहरु पनि हुनेछ । ‘अब व्यवसायिक साहित्य, रंगकर्म हुनुपर्छ । कविता पनि बेच्नुपर्छ । लाइटको साथ, हावापानी, संगीतको साथमा कविता वाचन गर्दा टिकट शो हुन्छ,’मेन्याङ्बोले भने,‘यो बौद्धिक विकासको पाटोमा ज्यादै महत्वपुर्ण हुनेछ ।’
नाटक घर निर्माणबारे भोली वृहत छलफल हुनेछ
पछिल्लो समय सभागृहमा नाटक घर निर्माणस्थलबारे स्थानीयबाट विरोध भइरहेको छ । वडा अध्यक्षसहित टोल विकास संस्था(टिएलओ)हरुले नाटक घर निर्माण गर्न नहुने भन्दै सभागृहलाई खुलारुपमा नै छोड्नुपर्ने उनीहरुको माग छ । साथै उनीहरुले चिल्ड्रेन पार्क बनाउने योजना पनि अघि सारेको छ ।
स्थानीयहरु हिजो धरानका मेयर तथा उपमेयरलाई भेटेर पनि आफ्ना मागहरु राखेका थिए । स्थानीयको विरोध आउन थालेपछि नाटक घर शिलान्यासको कार्यक्रम तत्कालको लागि स्थगित भएको छ भने ४० लाख बजेट फ्रिज हुने चिन्ता पनि बढेको छ । यो समस्या हल गर्न आज मेयर तिलक राईले दुवै पक्षसँग छलफल गर्ने तयारी गरेका थिए । तर, सहिद स्मृति मावि र स्थानीयबीचको समस्या समाधान गर्न आफु ब्यस्त हुनु परेकोले भोली दुवै पक्षबीच छलफल गरिने मेयर राईले बताए ।
_1711524552_1711967437.jpg)
