धरानमा अन्तर्राष्ट्रिय साहित्यिक महोत्सव: साहित्यिक विमर्शसँगै विमोचन, सम्मान र गजलको महफिल जम्दै (भिडियो/फोटोफिचर)

धरान: धरानको साहित्य, कला तथा सँस्कृतिको उत्थान एवं विकास गर्ने तथा अन्तर्राष्ट्रिय क्षेत्रमा पुर्याउने उद्देश्यले धरानमा दुई दिने अन्र्तराष्ट्रिय साहित्यिक तथा साँस्कृतिक महोत्सव शुरु भएको छ ।

धरान उपमहानगरपालिकाको १३ नम्बर वडाको कार्यालय आयोजक रहेको महोत्सवमा नेपाल र भारतका कवि, साहित्यकारहरु सहभागी छन् । वडा १३ स्थित धरान बैक्वेटमा आयोजित महोत्सव नेपाल प्रज्ञा प्रतिष्ठानका कुलपति गंगाप्रसाद उप्रेतीको प्रमुख आतिथ्यमा उद्घाटन भएको हो । महोत्सव उद्घाटन अघि छाताचोकबाट नेपाल तथा भारतबाट सहभागी हुन आएका साहित्यकारहरुलाई भव्य स्वागत गरिएको थियो । उनीहरुलाई स्वागत गरि कार्यक्रमस्थलसम्म र्याली निकालिएको थियो ।

कार्यक्रममा डा.भीम खतिवडाले नेपाली साहित्यमा धरानको योगदानबारे कार्यपत्र प्रस्तुत गरेका थिए । यस्तै, भारतबाट आएका साहित्यकार नरबहादुर दाहालले पनि कार्यपत्र प्रस्तुत गरेका थिए । कार्यक्रममा साहित्यकार एवं रंगकर्मी गोपाल देवान(अविराम क्रान्ति)द्धारा लिखित नाटक दमनको रापको विमोचन गरिएको थियो । नेपाल र भारतका कविहरुले कविता वाचन गरेका थिए । कार्यक्रममा नेपाल र भारतका ४ जना साहित्यकारहरुलाई सम्मान पनि गरिएको थियो । आयोजक मुल कमिटीका सदस्य सचिव विष्णु चौलागाईका अनुसार भारत कालेबुङका नरबहादुर दाहाल र भारत खर्साङका कृष्ण प्रधानलाई प्रवासमा रहेर पनि नेपाली भाषा, साहित्यमा पुर्याएको बिशिष्ट योगदानको सम्मान गरिएको हो । 

यस्तै, लोक वाद्यको संरक्षणमा योगदान पुर्याएका झापाको दमक निवासी मातृका संग्रौला र शिवसताक्षी ५ झापाकी भगवती ढुंगेललाई पनि साहित्यमा पुर्याएको योगदानको कदर गर्दै सम्मान गरिएको आयोजक मुल समितिको भनाई छ । महोत्सवमा साँझ गजलको महफिल पनि जमिरहेको छ । नेपाल, भारतका गजलकारहरुले आफ्ना गजलहरु वाचन गरिरहेका छन् । यस्तै, गरिमा डान्स सेन्टरले नृत्य पनि प्रस्तुत गरिरहेको छ । कार्यक्रमको दोस्रो तथा अन्तिम दिन शनिबार बिहान धार्मिक पर्यटकीयस्थलहरुको अवलोकन भ्रमण कार्यक्रम हुनेछ भने दिउँसो गजल वाचन, नाटक मञ्चनलगायत कार्यक्रमहरु हुने मुल आयोजक समिति संयोजक वम देवानले जानकारी दिए । 

वडा नं १३ का अध्यक्ष नेत्र काफ्लेले निर्वाचित भएर आइसके पछि भौतिक विकास निर्माणमा मात्र नभै बौद्धिक विकास पनि आवश्यक भएकोले आफ्नो वडामा कोही फरक काम गर्न प्रयास गरेको बताए । उनले भने,‘बाटो बनाउने, ड्रेन बनाउने कामतिर मात्र केन्द्रीत रह्यौं । तर मैले केही फरक काम गर्न खोजेको छुँ । भोतिक विकाससँगै बौद्धिक विकास चाहिन्छ, र मात्र समग्र राष्ट्र विकास हुन्छ भन्ने मान्यताले अघि बढेको हुँ । यो श्रष्टाहरुको सम्मान पनि हो,’उनले भने ।भाषाविद् डा.टंक न्यौपानेले एउटा वडाले अन्तर्राष्ट्रियस्तरको साहित्यिक महोत्सव कार्यक्रम गर्नु ठुलो कार्य भएको भन्दै वडाअध्यक्षको प्रशंसा गरे ।