धरान: धरानमा जारी छैटौं हराईजन टुबोर्ग राष्ट्रिय बास्केटवल कपमा काठमाण्डौंको टाइम्स क्लब सेमिफाइनलमा प्रवेश गरेको छ ।

धरान १७ स्थित श्री घोपा माविको कोर्टमा मंगलबार भएकोे अन्तिम क्वाटरफाइनल खेलमा बिर्तामोड बास्केटबल क्लब झापालाई फराकिलो अन्तरले पराजित गर्दै टाइम्सले सेमिफाइनलमा प्रवेश गरेको हो । खेलमा टाईम्स क्लबले विर्तामोडलाई १३१–६८ को फराकिलो स्कोरले पराजित गर्यो । टाईम्स क्लबले प्रत्येक क्वाटर २८–३५–४४–२४ स्कोर गरेको थियो भने विर्तामोडले २४–१२–१५–१७ स्कोर गरेको थियो । 

खेलको म्यान अफ द म्याच पराजित विर्तामोड क्लबका अविशेकराज सिंह भए । उनले टिमका लागि व्यक्तिगत २० स्कोर गरेका थिए भने टाईम्स क्लबका विक्रम जोशीले खेलमा सर्वाधिक २४ स्कोर गरेका थिए । टाइम्स क्लबमा ६ जना सदस्य राष्टिय टिमका सदस्यहरु छन् । राष्टिय बास्केटबल टिमका क्याप्टेन सदिश प्रधान, बिक्रम जोशी, बिजय बुर्जा, मोबिन्द्र क्षेत्री र मनिष केसी टाइम्सबाट खेलिरहेका छन् । 

मंगलबार अन्तिम क्वाटरफाइनल खेल सम्पन्न भएसंगै सेमिफाइनल समिकरण पनि पुरा भएको आयोजक हराईजन क्लबले जनाएको छ । बुधबार पहिलो सेमिफाइनल खेल बिभागीय टिम त्रिभुवन आर्मी क्लब र रोयल्स बास्केटबल एकेडेमी काठमाण्डौ बिच हुनेछ । बिहिबार भने टाईम्स क्लब र विशाल मिलन केन्द्र काठमाण्डौबीच दोस्रो सेमीफाइनल खेल हुनेछ । प्रतियोगिताको फाइनल चैत ११ गते हुनेछ । बिजेताले नगद १ लाख ११ हजार १ सय ११ रुपैया र उपबिजेताले ५५ हजार रुपैया पाउनेछन् ।