_1704867435.jpeg)
धरान: मेयर हर्क साम्पाङ र बराह सहकारी पीडित संघर्ष समितिबीच बिहिबार उपमहानगरपालिकामा छलफल भएको छ ।
मेयरको कार्यकक्ष तोडफोडको घटना पछि करिब तीन महिनाको संवादहिनता अन्त्य गर्दै संघर्ष समिति र मेयर साम्पाङबीच बिहिबार औपचारिकरुपमा छलफल भएको हो । छलफलको क्रममा संघर्ष समितिका अध्यक्ष श्याम ढकालले गत साउन १५ गतेको कार्यकक्ष तोडफोड भएको घटनामा त्रुटी भएको भन्दै माफीसमेत मागे । ‘त्यस घटनामा हामी सर्मिन्दा छौं, र माफी पनि माग्दछौं, अध्यक्षको नाताले सम्पुर्ण बराह संघर्ष समितिको तर्फबाट । यो कुरालाई साहै गरेर नलिइदिनु हुनेछ भन्ने आग्रह पनि गर्दछौं,’ अध्यक्ष ढकालले भने ।
संघर्ष समितिकै प्रस्तावमा उपमहानगरले बराहको सम्पत्ति रोक्का गर्न पत्राचार गरेको भन्दै अध्यक्ष ढकालले त्यसो गर्दैमा समस्या समाधान हुने स्थिति नदेखिएको र पीडितहरु पीडाकै अवस्थामा रहने देखिएको बताए । साथै, बराह संस्था झन् डुब्ने अवस्था देखिएकोले समझदारीमा जाने निर्णय गरिएको पनि बताए । पटक पटक छलफल गर्दा कानुनी प्रक्रिया अघि बढाउदा पीडितहरुले न्याय पाउने अवस्था नदेखिएको र बराहलाई चलायमान बनाउनु नै उत्तम हुने राय, सुझाव आएकोले संघर्ष समिति पनि सोही निर्णयमा पुगेको उनले बताए ।
सञ्चालक समिति अध्यक्ष शिवकुमार लामिछानेलेसहित सबैले आफ्नो व्यक्तिगत सम्पत्ति पनि बेचेर संस्थालाई अघि बढाउन सहयोग गर्ने प्रतिवद्धता जनाएकोले अब बराहलाई व्यापार गर्न दिनुपर्ने निष्कर्षमा संघर्ष समिति पुगेको पनि ढकालले बताए । ‘अब बराहलाई चलाउनुबाहेक अर्को विकल्प देखिएन, र छैन । बराह खोल्ने कुरामा हामी एकमत छौं । खोलिसकेपछि यो टिम संघर्ष समितिबाट अनुगमन टिममा रुपान्तरण हुन्छ, रेखदेख गरेर सञ्चालन गर्ने सहमतिमा पुगेका छौं,’उनले भने ।
मेयर साम्पाङले जनताले चाहेकै काम गर्न जनप्रतिनिधि चुनिएको उल्लेख गर्दै संघर्ष समितिको सबै वडाका संयोजकहरुसहितको लिखित निवेदन दिन आग्रह गरे । बराहको रोक्का सम्पत्ति खोल्ने बिषयमा निवेदन आएपछि आफुलाई तोक लगाउन पनि सजिलो हुने र प्रक्रिया अघि बढाउने भन्दै मेयरले भविष्यमा बराहलाई कसरी सञ्चालन गर्ने भनेर संघर्ष समिति अहिल्यै प्रष्ट हुन पनि सुझाव दिए । ‘भोली कसरी चलाउने हो, बराहलाई त्यसबिषयमा पनि प्रष्ट हुनुपर्छ । सञ्चालक समिति कसरी बनाउने ? पुरानै व्यक्तिले गर्ने वा संघर्ष समितिकोले मात्र गर्ने वा मिलेर गर्ने ? प्रष्ट भएर तयारी गर्नुस्,’मेयर साम्पाङले भने ।
मेयर साम्पाङले संघर्ष समितिको हरेक गतिविधि पारदर्शी गर्न आग्रह गर्दै सम्पत्ति खुल्ला गर्ने निर्णय, सहमतिलगायत बिषयमा पत्रकार सम्मेलन गरेर सबैलाई जानकारी दिन पनि सुझाव दिए । ‘जतिसक्यो धेरै पारदर्शी गर्नुस् । हामी यसो गर्दैछौं भनेर प्रष्ट पार्नुस्, जनताको सपोर्ट पनि आउछ । १८ हजार पीडितसँग म बसेर त साध्य हुदैन, तर तपाईहरुले भन्दै गरेको कुरा ती सबैलाई चित्त बुझ्दो हुनुपर्छ । पीडितले न्याय पाउने गरि हुनुपर्छ । तपाईहरुले यसो गदैछौ भनेर पत्रकार सम्मेलन गरेर सार्वजनिक गर्नुस्,’उनले भने । मेयर साम्पाङको सल्लाह वमोजिम संघर्ष समितिले शनिबार दिउँसो २ बजे पत्रकार सम्मेलन गर्ने जानकारी दिएको छ ।
बराह सहकारीले सेयर सदस्य तथा वचतकर्ताहरुको रकम फिर्ता गर्न नसकेपछि संघर्ष समिति गठन गरेर आन्दोलन शुरु भएको थियो । बराहको सम्पुर्ण व्यापार, व्यवसाय अहिले ठप्प छ । संघर्ष समितिका अनुसार १८ हजारको हाराहारीमा वचतकर्ताहरु पीडित छन् । कति रकम फिर्ता गर्नुपर्ने भन्ने यकिन नभएपनि १४ अर्ब रकम फिर्ता गर्नुपर्ने देखिएको बताइएको छ । संघर्ष समितिले आन्दोलन गर्ने क्रममा गएको साउन १५ गते उग्ररुप लिदा मेयर साम्पाङको कार्यकक्षको भेन्टिलेसनको सिसा फोडिएको थियो । मेयरले आन्दोलन नेतृत्व गर्ने तत्कालिन संघर्ष समिति अध्यक्ष खगेन्द्र नेपाली र प्रवक्ता प्रदिप बास्तोलाविरुद्ध उजुरी दिएपछि पक्राउसमेत परेका थिए ।
