_1704867435.jpeg)
धरान: बराह ग्रुपको धरान ८ स्थित बराह सपिङ मल शुक्रबारदेखि खुलेको छ ।
बराह सहकारी पीडित संघर्ष समितिले बराह संस्था जोगाउने र पीडितहरुको पैसा पनि डुब्न नदिन व्यापार, व्यवसाय गर्न दिने निष्कर्षमा पुगेसँगै शुक्रबारदेखि आंशिकरुपमा धरान ८ स्थित बराह सपिङ मल खुलेको हो । बराह ग्रुपका व्यवस्थापन पक्ष तथा सहकारी सञ्चालकहरुसँग के कस्तो सहमति भएको हो, यसबारेमा संघर्ष समितिले शनिबार दिउँसो २ बजे पत्रकार सम्मेलन गरेर औपचारिक जानकारी दिने भएको छ ।
यद्यपी, बिहिबार मेयर हर्क साम्पाङसँगको छलफलमा संघर्ष समितिले अब बराहलाई पुर्णरुपमा डुब्न नदिन समझदारीमा आउने र रोक्का गरिएको सम्पत्ति एवं खाता खोल्ने निर्णय गरिएको बताएको थियो । मेयर साम्पाङले पनि निर्णयसहित निवेदन दिएपछि रोक्का गरिएको सम्पत्ति तथा खाता फुकुवा गर्ने प्रक्रिया अघि बढाउने बताएका थिए ।
बराह सहकारीका अध्यक्षसमेत रहेका मानबहादुर विश्वकर्माले संघर्ष समिति सकरात्मक भएपछि शुक्रबार आंशिकरुपमा धरान ८ को सपिङ मल खोलेको बताए । उनले व्यापार, व्यवसाय सुचारु गर्ने आवश्यक तयारी गरिएको पनि बताए । ‘तत्काल स्टक सामानहरु क्लियरेन्स गर्नुपर्ने छ । लामो समय बन्द भएकोले सरसफाई पनि गर्नुपर्नेछ । रोक्का भएको सम्पत्ति र खाताहरु कानुनीरुपमा फुकुवा भएपछि हामीलाई व्यापार, व्यवसाय सहजरुपमा गर्ने वातावरण बन्नेछ,’उनले भने,‘संघर्ष समिति, सम्पुर्ण सेयर सदस्य तथा वचतकर्ता ज्युहरुले हामीलाई व्यापार, व्यवसाय गर्ने वातावरण बनाइदिनुहुनेछ भन्ने आशा राख्छौं ।’
संघर्ष समितिले बराह व्यवस्थापनसँग १६ बुँदे माग राखेको थियो । ती मागहरुलाई व्यवस्थापन पक्षले पुरा गर्ने प्रतिवद्धता जनाएको छ । व्यापार, व्यवसाय सहजरुपमा अघि बढ्दै गएपछि बराहले एउटा कोष बनाएर केही प्रतिशत रकम जम्मा गर्ने पनि अध्यक्ष विश्वकर्माले जानकारी दिए । उक्त कोषबाट अतिआवश्यक देखिएका वचतकर्ताहरुलाई आपतकालिन भुक्तानी गर्ने योजना बनाएको पनि उनले बताए ।
यस्तै, संघर्ष समितिसहितको अनुगमन समिति बनाइने, विज्ञसहित बराह ग्रुपको व्यवस्थापनको टिम तयार गरिने, सम्पत्ति बिक्रीको लागी पनि समिति गठन गर्ने र कार्यविधि बनाउने, वचत रकम भुक्तानीको लागी पनि कार्यविधि बनाउने, ऋण उठाउन टोली खटाउनेलगायत सुधार गर्न तथा विश्वास आर्जन गर्न बराह व्यवस्थापन पक्षले योजना तयार गरेको छ । बराहको रकम तथा सम्पत्ति सञ्चालक एवं कर्मचारीहरुबाट अपचलन भएको टिकाटिप्पणी उठिरहेको कारण त्यसबारेमा पनि छानबिन गर्ने प्रतिवद्धता बराहले जनाएको छ । ‘छानबिनको क्रममा काम छोडेका कर्मचारी वा विगतका सञ्चालक समिति सदस्यहरुले अपचलन गरेको पुष्टि भएमा कानुनी कारबाहीको दायरामा ल्याएर सम्पत्ति असुलउपर गछौं,’उनले भने ।
