_1704867435.jpeg)
धरान: नेपाल खाद्य प्रविधि विद्यार्थी संघ (नेप्सा) केन्द्रीय प्रविधि क्याम्पस हात्तिसारको आयोजनामा भोली सोमबारदेखि अन्तरकलेज नेप्सा कप फुटबल २०७९ आयोजना हुने भएको छ ।
संघका अनुसार प्रतियोगिता धरान १४ स्थित क्याम्पसको खेल मैदानमा हुनेछ । प्रतियोगिता कार्तिक २१ गतेदेखि २५ गतेसम्म हुनेछ । प्रतियोगिता महिला र पुरुष दुवैको हुने कार्यवाहक सभापति जनक दाहालले जानकारी दिए । उनका अनुसार प्रतियोगितामा नेपालका खाद्य प्रविधि संकाय पढाई हुने कलेजहरुले मात्र भाग लिन पाउनेछन् ।
प्रतियोगितामा प्रथम हुनेले नगद १० हजार र उपविजेताले नगद ५ हजार पुरस्कार, ट्रफी, मेडल तथा प्रमाणपत्र प्राप्त गर्नेछ । प्रतियोगिता महिलातर्फ ७ साइज र पुरुषतर्फ ९ साइजको खेल हुने पनि संघले जनाएको छ । खाद्य प्रविधि अध्ययनरत विद्यार्थीहरुबीच अन्तरक्रिया, भातृत्व तथा समन्वय वृद्धि गराउने उद्देश्यले हरेक बर्ष प्रतियोगिता आयोजना भइरहेको आयोजकले जनाएको छ ।
