_1704867435.jpeg)
धरान: सोमबार बिहान बसेको धरानको कार्यपालिका बैठकमा वडा नं १० का अध्यक्ष विवेक राईले दिएको अभिव्यक्तिप्रति धरान फुटबल क्लबले आपत्ति जनाएको छ ।
क्लबले मंगलबार पत्रकार सम्मेलन गर्दै कुनै पनि वहानामा क्लबको मानमर्दन सह्य नहुने भन्दै कडारुपमा भत्र्सना गर्ने पनि जनाएको छ । सोमबार कार्यपालिका बैठकमा वडाअध्यक्ष राईले सबै क्षेत्रको बजेट घट्दा बुढासुब्बा गोल्डकपलाई विनियोजन गरिएको ९ लाख बजेटमा पनि घटाएर ७ लाख बनाउनुपर्ने धारणा राखेका थिए । साथै, बुढासुब्बा गोल्डकपले बुढासुब्बा गोल्डकपको गएको सँस्करणको हिसाबकिताब सार्वजनिक नगरेको भन्दै पारदर्शी नगरे बजेट नदिने र अरु नै क्षेत्रमा दिनुपर्ने धारणा पनि राखेका थिए । उनको भनाईमा मेयर हर्क साम्पाङले पनि समर्थन जनाएका थिए ।
क्लबले भने प्रतियोगिता सम्पन्न भएपनि अझै केही संघसंस्थाबाट र धरानकै केही वडाहरुबाट अझै पनि छुट्याएको रकम प्राप्त हुन नसकेकोले असार मसान्तसम्म पर्खने निर्णय गरेकोले हिसाबकिताब सार्वजनिक गर्न ढिलाई भएको जनाएको छ । क्लबका महासचिव प्रताप तामाङले आर्थिक बर्षको समाप्तीपछि मात्र बितेको बर्षको लेखा परीक्षण हुनेबारे वडाअध्यक्षले हेक्का राख्नुपर्ने बताए । साथै उनले प्रतियोगिताको आयव्यय चाडो सार्वजनिक गर्ने पनि प्रतिवद्धता जनाए ।
डस्टबिन नराखेको कुरा गरेको तर छिमेकी सहरहरुमा फ्लड लाइट जडान भएर रात्रीकालिन प्रतियोगिता शुरु भइसक्दा पनि धरानमा फ्लड लाइट नभएको कुरा वडाअध्यक्ष राईले किन नउठाएको भन्दै प्रश्न गरेका छन् । यस्तै, यति लामो समय बितिसक्दा पनि रंगशाला निर्माण कार्य सम्पन्न हुन नसकेकोमा प्रश्न किन नउठाएको भन्दै उनले वडाअध्यक्ष राईलाई प्रश्न गरे । ‘अझ अघि बढेर सोध्न चाहन्छौं कि नगर खेलकुद विकास समिति गठन गर्न सक्नुभयो ?’ महासचिव तामाङले भने ।
हामीलाई एकपैसा चाहिदैन, तर अपमान गर्न पाइदैन: अध्यक्ष किशोर राई
धरान फुटबल क्लबका अध्यक्ष एवं प्रदेश फुटबल संघका अध्यक्षसमेत रहेका किशोर राईले जनप्रतिनिधिहरुले क्लबले फुटबल खेलको विकासमा गरेको योगदानको सम्मान गर्नुको साटो अपमान गर्ने कार्य गरेको बताए । उनले खेलकुदको विकासको लागि नीति, कार्यक्रम बनाउन खेलकुद सम्बद्ध संघसंस्था, व्यक्तिहरुसँग समन्वय पनि नगर्ने र उल्टै खेलकुदको अपमान गर्ने गरि अभिव्यक्तिहरु दिएको भन्दै आक्रोश पनि व्यक्त गरे । 'हामीलाई एकपैसा चाहिदैन, तर यसरी अपमान गर्न पाइदैन,' उनले भने ।
अध्यक्ष राईले खेलकुदको विकास गर्ने हो भने कुल बजेटको ५ प्रतिशतसम्म विनियोजन गरिनुपर्ने पनि बताए । खेलकुदको विकासको लागि गरिएको माग सम्बोधन नगरि उल्टै अपमान भएको भन्दै अध्यक्ष राईले असन्तुष्टी जनाए । ०७८ सालसम्मको आयव्यय वैधानिकढंगले अडिट गरेर क्लब सञ्चालन गरेको उल्लेख गर्दै उनले कार्यपालिका बैठकको अभिव्यक्ति सच्याउनुपर्ने र बजेट न्यायपुर्ण नभएकोले पुर्नविचार हुनुपर्ने माग गरे । उनले प्रतियोगिता आयोजनाको लागि मात्र नभै खेलकुदको पुर्वाधार निर्माण र विकासमा पनि बजेट विनियोजन गर्नुपर्ने बताए ।
धरान फुटबल क्लबलाई पटक पटक प्रहार गरेको भन्दै उनले क्लबका सदस्यहरुको तीन पुस्ते छानबिन गर्नुपर्ने पनि बताए । कार्यपालिका बैठकमा धरानको दीर्घकालिन विकासको लागि छलफल नै नभएकोमा चिन्ता व्यक्त गर्दै उनले सानो तिनो बजेटमा विवाद गरेको बताए ।
भिडियो:
