_1704867435.jpeg)
धरान: आन्दोलनरत शिक्षक, कर्मचारीहरुले वीपी कोइराला स्वास्थ्य विज्ञान प्रतिष्ठान धरानका स्वास्थ्य मन्त्री मोहनबहादुर बस्नेत र कायममुकायम उपकुलपति प्रा.डा.प्रह्लाद कार्की समस्या समाधान गर्न नभै कमिशनको खेलमा लागेको आरोप लगाएका छन् ।
प्रतिष्ठानका शिक्षक, कर्मचारीहरु का.मु.उपकुलपति कार्कीले रोकेको आफ्नो बढुवा प्रक्रियालाई सुचारु गर्नुपर्ने माग राख्दै आन्दोलनरत छन् । उनीहरुको भद्र अवज्ञा आन्दोलनले ओपिडी सेवा अवरुद्ध छ भने विद्यार्थीहरुको पठनपाठन पनि रोकिएको छ । यस्तो संवेदनशील अवस्था हुँदा पनि स्वास्थ्य मन्त्री बस्नेत र का.मु.उपकुलपति कार्कीको ध्यान समाधान गर्नतर्फ नभै सिनेट बैठक बोलाएर ठेकेदारको विल भुक्तानीको निर्णय गराएर कमिशन लिन केन्द्रीत भएको आरोप आन्दोलनरत पक्षको छ ।
प्रतिष्ठानको निर्माणाधिन एमसिएच (मातृशिशु स्याहार केन्द्र) भवनको ठेकेदारलाई ४८ करोड बराबरको बिल भुक्तानी गर्नुपर्नेछ । उक्त भुक्तानी सिनेट बैठकबाट स्वीकृत गराएर मात्र हुने भएकोले मन्त्री र का.मु.भिसि आन्दोलनकारीहरुको माग सम्बोधन भन्दा पनि सिनेट बैठक बोलाउन जोडबलमा लागेका हुन् । उक्त बिल स्वीकृत गराएर भुक्तानी गराएवापत ठेकेदारले २० प्रतिशत अर्थात करिब साढे ९ करोड कमिशन दिने वचन दिएको पनि प्रतिष्ठानका आन्दोलनरत पक्षको दाबी छ ।
आन्दोलनरत पक्षको भेलालाई सम्बोधन गर्दे कर्मचारी महेश्वार राईले स्वास्थ्य मन्त्रीलाई बढुवामा कुनै चासो नभएको तर ४८ करोडको कमिशनको खेलमा लागेको बताए । उनले भने,‘मन्त्रीलाई पनि बढुवामा मतलब छैन, एमसिएच भवनको ४८ करोडको कमिशनको रोटी सेकाउदैछ, यसको लपेटामा हाम्रो का.मु.उपकुलपति र उसका सिखण्डीहरुले ब्याकअप दिदैछ ।’
शिक्षक, कर्मचारीहरुको बढुवा प्रक्रिया अघि बढाउन नियम कानुनले नदिने भनेर अनेक वहाना गरिरहेको भन्दै उनले का.स.बैठकमा २ जना सदस्यलाई नबोलाउनु, रातारात एचओडि फेरिनुलगायत कार्य पनि का.मु.उपकुलपतिले नियम विपरीत गरेको बताए । ‘प्रक्रिया अघि बढीसकेको हाम्रो बढुवामा चै अहिले आएर नियम खोज्ने ?’उनले भने ।
शिक्षक कल्याण समाजका अध्यक्ष डा.सेराज अहमद खानले सहकुलपति (मन्त्री) र का.मु.उपकुलपति डा.कार्कीको अरु नै स्वार्थ रहेकोले नियम, कानुनले नरोक्ने बढुवाको अन्र्तवार्ता सुचारु गर्न नमानेको बताए । ‘उहाँहरुलाई अरु कुनै मतलब नै छैन । कसरी हुन्छ, सिनेट बसाउने भन्ने छ । त्यसैले पक्कै केही स्वार्थ लुकेको छ,’उनले भने, ‘सिनेट बसाउने षडयन्त्र किन हुदैछ ? एमसिएच भवनको विल भुक्तानीको कुरा हुनसक्छ ।’
अन्तर्वार्ता गर्न सिनेट किन चाहियो ?
अध्यक्ष डा.खानले अहिलेसम्म भएको बढुवाको अन्तर्वार्ता सिनेट बसेर नभएको भन्दै पुरानो नियमावली अनुसार नै विज्ञापन भएर शुरु भएको बढुवा प्रक्रियाको लागी सिनेट बसाउन हतार गर्नुले पनि स्वार्थ लुकेको देखिने बताए । ‘६० प्रतिशतको अन्तर्वार्ता सकिसकेको अवस्थामा अब चै सिनेटमा प्रस्ताव लैजाने रे । त्यस्तो पनि हुन्छ ? कानुनी अड्चन भन्छन्, तर के हो ? त्यो देखाउनुपर्यो नि,’ उनले भने,‘का.मु.उपकुलपतिले यही का.स.बैठकबाट निर्णय गर्न मानेनछन् । अन्य पदाधिकारीहरुले सिनेटपछि सुचारु गर्ने भने । तर हाम्रो माग सिनेट अघि अन्तर्वार्ता सक्नुस्, र सिनेट बसेर रिजल्ट निकाल्नुस् भनेका छौं ।’
अन्तार्वार्ता रोक्नुमा का.मु.उपकुलपतिकी श्रीमतिको भुमिका
आन्दोलनरत शिक्षक, कर्मचारीहरुले आफुहरुको बढुवा प्रक्रियको अन्तर्वार्ता बीचमै रोकिनु र अहिले सुरुवात हुन नसक्नुमा का.मु.उपकुलपति डा.कार्कीकी श्रीमति प्रा.डा.संगीता भण्डारीको मुख्य हात रहेको बताउदै आएका छन् । डा.भण्डारी प्रतिष्ठानकी नाक,कान,घाँटी विभाग प्रमुख पनि हुन् । साथै उनी विगतमा राप्ती स्वास्थ्य विज्ञान प्रतिष्ठान र पाटन स्वास्थ्य विज्ञान प्रतिष्ठानको उपकुलपति पनि भइसकेकी छिन् ।
केन्द्रसम्म वलियो राजनीतिक पहुँच भएकी डा.भण्डारीकै कारणले अहिले प्रतिष्ठानमा भाडभैलो बनेको चर्चा छ । उनकै कारणले का.मु.उपकुलपति डा.कार्कीले का.स.बैठकबाट अन्तार्वार्ताको मिति तोक्न नसकेको आरोप छ । आन्दोलनरत पक्षले डा.भण्डारीले खुलेर नै बढुवाको अन्र्तवार्ता शुरु नहुने भनेर चुनौती दिने गरेको बताउँछन् । शिक्षक कल्याण समाजका अध्यक्ष डा.खानका अनुसार आज (मंगलबार) बिहान पनि भण्डारीले खुलेआम तिमीहरुको अन्तर्वार्ता हुदैन भन्ने अभिव्यक्ति दिएकी थिइन् । ‘आज पनि मरेर पनि तिमीहरुको अन्तर्वार्ता हुदैन भन्नुभयो, उहाँको विभागमा पनि त्यही भन्नुहुन्छ रे,’खानले भने,‘का.मु.भिसिलाई निर्णय गर्न नदिनुमा उहाँको भुमिका पक्कै छ ।’
भिडियो:
