_1704867435.jpeg)
धरान: पहिलो पटक रातीको समयमा आयोजना भएको २५ औं गोधुली रनिङ कप फुटबल प्रतियोगिताको आज हुने फाइनलमा धरान वडा नं १४ र १५ बीच मैदानमा उपाधि भिडन्त हुनेछ ।
धरान १६ स्थित रंगशालामा दुवै वडा एकअर्काको चुनौती सामना गर्दा लक्ष्य एक हुनेछ, दोस्रो पटक उपाधि उचाल्ने । दुवै वडाले गोधुलीको २५ औं सँस्करणसम्म आइपुग्दा एक एक पटक मात्र उपाधि चुम्ने अवसर पाएको छ । यसअघि वडा १४ ले २१ औं सँस्करणमा उपाधि जितेको थियो भने वडा १५ ले १४ औं सँस्करण जितेको थियो ।
रात्रीकालिन प्रतियोगिता भएकोले पनि दर्शकको उल्लेख्य साथले खेलाडीहरुलाई हौस्याइरहेको छ । आजको फाइनलमा दुवै वडाबाट समर्थकहरुको साथ पाउने र त्यसले फाइनल जिताउन ठुलो भुमिका खेल्ने अपेक्षा दुवै टिमले लिएको छ । यद्यपी दुवै वडाको टिम वलियो वडालाई पराजित गर्दै फाइनल पुगेकोले खेल ज्यादै प्रतिस्पर्धात्मक र रोमाञ्चक हुने अपेक्षा छ ।
वडा १४ का कोच शिव राईले वडा १५ राम्रो टिम भएपनि आफुहरु उपाधि जित्ने लक्ष्यका साथ मैदानमा उत्रने बताए । उनले आफ्नो टिममा डिफेन्स र मिडफिल्ड वलियो पक्ष रहेकोले विपक्षी टिमले गोलपोष्टमा प्रहार गर्ने मौका नपाउने पनि बताए ।
वडा १७ सँगको तनावपुर्ण सेमीफाइनल खेलमा पेनाल्टी दिएपछि खेलाडीले होइन भनेर अपिल गर्दा रेफ्रीले गैरजिम्मेवार जवाफ दिएकोले समस्या भएको बताए । उनले आफ्ना खेलाडीहरु अनुशासित भएर नै खेल्ने बताउदै वडा नं १७ ले फेयर प्ले गरेकोमा आभार पनि प्रकट गरे । तनावपुर्ण अवस्था भएर खेल रोकिएपछि उक्त पेनाल्टी वडा १७ ले गोलकिपरको हातमा दिदै फेयर प्लेको नमुना प्रर्दशन गरेको थियो ।
यस्तै, वडा १५ का मेनेजर जुदास राईले गत बर्ष आफ्नो वडा प्रतिबन्धमा परेर खेल्न नपाएकोले यो बर्ष फाइनल पुगेर देखाउने अठोट लिएर सहभागी भएको बताए । आफ्ना समर्थकहरुलाई अब उपाधि उचालेर गत बर्ष प्रतिबन्ध लागेको जवाफ दिने पनि उनले बताए । समर्थकहरु १२ औं खेलाडीकोरुपमा अथ्र्याउदै उनले समर्थकको हुटिंगले खेलाडीमा उर्जा थपिने बताए ।
फरक प्रसंगमा उनले गोधुली कप धेरै उत्कृष्टरुपमा आयोजना भइरहेको र यस्तै अवस्था रहे बुढासुब्बा गोल्डकप हराउने पनि टिप्पणी गरे । टिम क्याप्टेन आशुतोष राईले प्रतियोगिता शुरु हुनु एक महिना अघिदेखि प्रशिक्षण लिएको खुलाउदै सतप्रतिशत मैदानमा खेलेर उपाधि जित्ने बताए । उनले एयरवलमा मात्र फ्लड लाइटले केही समस्या भएपनि समग्रमा रात्रीकालिन प्रतियोगिताले खेलाडीहरुमा उत्साह भरेको बताए ।
गायिका तृष्णा गुरुङ आउने, मेयर साम्पाङ प्रमुख अतिथि
२५ औं गोधुली रनिङ कपको आज राती हुने समापन समारोहमा प्रमुख अतिथिकोरुपमा मेयर हर्कराज राई (साम्पाङ) रहने आयोजक गोधुली क्लबले जनाएको छ ।
यस्तै, उक्त समापन समारोहमा चर्चित गायिका तृष्णा गुरुङ पनि आउनेछिन् । उनले आफ्ना गीतहरु प्रस्तुत गरेर दर्शकहरुलाई मनोरञ्जन दिनेछिन् भने समापन समारोहलाई भव्य बनाउने आयोजकको तयारी छ ।
भिडियो:
