धरानमा फुटबल खेलेर सहयोग जुटाउदै पुर्व गोर्खा लाहुरेहरु (भिडियोसहित)

धरान: फुटबल खेल भनेपछि हुरुक्कै हुने पुर्व ब्रिटिश गोर्खा लाहुरेहरुले एउटा क्लब खोलेका छन्, एफसि गोर्खा भेट्रान युके । करिब पाँच बर्षअघि स्थापना भएको यो क्लब फुटबल मात्र खेल्दैन, फुटबल खेलेरै समाजसेवामा सक्रिय छ ।

क्लबका सदस्यहरु विभिन्न ठाउँमा च्यारिटी कार्यक्रममार्फत सहयोग जुटाउदै धरान आइपुगेका छन् । क्लबका मेनेजर बद्रीकुमार सुनुवारका अनुसार ६ मार्चमा ताप्लेजुङ रनमा च्यारिटी रन आयोजना भएको थियो भने ९ मार्चमा इलाममा माइभ्याली भेट्रानसँग मैत्रीपुर्ण फुटबल खेल आयोजना भएको थियो । ‘भोली शनिबार हामी धरानमा च्यारिटी मैत्रीपुर्ण फुटबल खेल खेल्दैछौं, यहाँका पुर्वाञ्चल बहिरा विद्यालय र सुस्त मनस्थिति बाल कल्याण विद्यालयलाई सहयोग जुटाउने उद्देश्य हो,’उनले भने ।

शनिबार धरान १६ स्थित रंगशालामा गोर्खा भेट्रान युके र धरान भेट्रान फुटबल क्लबबीच मैत्रीपुर्ण खेल हुनेछ । गोर्खा भेट्रानका १६ जना टोली धरान आएका छन् । धरान भेट्रान फुटबल क्लबबाट धरानका मेयर तिलक राई, पुर्वराष्ट्रिय खेलाडी तथा एन्फा प्रदेश १ अध्यक्ष किसोर राई, रोमी मोक्तान, अर्जुन राई, सतिस केसीलगायत मैदानमा उत्रने छन् । ‘हामीले च्यारिटीको लागि न्युनतम २ सय रुपैयाको टिकट बिक्री गरेका छौं, त्यो भन्दा माथि जति पनि सहयोग गर्न सक्नुहुनेछ,’धरान भेट्रानका खेलाडी रोमीले भने,‘हामीले पनि ५० हजारजति संकलन हुने अपेक्षा लिएका छौं ।’

यसअघि ताप्लेजुङ रनमा युकेबाट संकलन भएको २ लाख ५५ हजारसहित ३ लाख ५ हजार रुपैया सहयोग प्रदान गरिएको गोर्खा भेट्रान युके टिमका सदस्य लोक चेम्जोङले जानकारी दिए । इलाममा भने मैत्रीपुर्ण फुटबल खेलिएको र माइभ्याली भेट्रानलाई ड्रेस(जर्सी)सहयोग गरिएको उनले बताए । ‘युकेमा थुप्रै च्यारिटी कार्यक्रम भइरहन्छ, हामी फुटबलर भएकोले फुटबलबाट नै केही गरौं भन्ने उद्देश्यले यस्तो च्यारिटी कार्यक्रम गर्दै आएका छौं,’चेम्जोङले भने ।

बेलायतमा एक, दुई पाउण्ड गर्दै सहयोग उठाएको गोर्खा भेट्रान युके टिमका छवि लिम्बुले बताए । उनले यसअघि पनि काठमाण्डौंमा सिआरसि(चाइल्ड रेस्कु सेन्टर)लाई पनि सहयोग गरिएको जानकारी दिए । ‘माउण्टेन चाइल्डलाई पनि सहयोग गर्यौं, च्यारिटी कार्यक्रम गर्नु निक्कै गाह्रो हो । सबैको विश्वास जितेर युकेमा एक, दुई पाउण्ड संकलन गर्नुपर्छ,’उनले भने,‘जागिरबाट र परिवारबाट पनि छुटकारा पाएर कार्यक्रममा आउनुपर्छ, सजिलो छैन । हामी सबै फुटबलर हौं, र परिवारले पनि बुझेका छन् ।’