धरानको १२ स्थानमा हेल्थ डेस्क राखियो

धरान: कोरोना भाइरस(कोभिड १९)को संक्रमणबाट जोगिन धरान उपमहानगरपालिकाले सर्वसाधारणको आवतजावत बढी हुने एक दर्जन स्थानहरुमा हेल्थ हेस्क राखेको छ ।

उपमहानगरपालिका परिसरसहित आज धरानको विभिन्न १२ स्थानमा हेल्थ डेस्क राखिएको हो । स्वास्थ्यकर्मीसहित साबुन पानी, सेनिटाइजर र कोरोना सम्बन्धी जनचेतनामुलक पर्चासहित हेल्थ डेस्क राखिएको छ । उपमहागनर परिसरमा मेयर तिलक राई र उपमेयर मञ्जु भण्डारीले साबुन पानीले हात धोएर हेल्थ डेस्कको उद्घाटन गरेका थिए ।

उपमहानगरका वरिष्ठ प्रशासकीय अधिकृत एवं कोरोना सम्बन्धी जनचेतना अभिवृद्धि समितिका संयोजक गणेशप्रसाद खतिवडाका अनुसार यसअघि ११ स्थानमा हेल्थ डेस्क राख्ने निर्णय भएपनि एक स्थान थपेर १२ ठाउँमा डेस्क राखिएको हो । ‘स्वास्थ्यकर्मीसहित हात धुनलाई साबुन पानी, सेनिटाइजर र पर्चाहरु राखिएको छ,’उनले भने,‘सेनिटाइजर आफै उत्पादन गरिरहेका छौं । साबुन सकिए किन्छौं, मास्क पनि आफै उत्पादन गर्ने बारे सोच्दैछौं ।’प्रचार सामग्री ५० हजार प्रति छापिएको पनि उनले बताए ।

हेल्ड डेस्क उपमहानगरपालिकासहित इलाका प्रहरी, इलाका प्रशासन, छाता चोक, भानुचोक, जिरो पोइन्ट, १५ नम्बर वडा कार्यालय, धरान ५ स्थित देउराली प्रहरी चौकी, ६ नम्बर वडास्थित स्कुल डाँडा,मंगगलबारे र रेल्वे गरी ११ स्थानमा राखिएको छ । थप मालपोत कार्यालय धरानमा पनि राखिएको छ । कोरोना भाइरसको संक्रमणबाट जोगिन अनिवार्य हात धुने व्यवस्थासहित हेल्थ डेस्क राखिएको हो ।