_1704867435.jpeg)
धरान: बराह बचत तथा ऋण सहकारी संस्था लिमिटेडले आगामी २०७९ बैशाख १५ गतेदेखि वचतकर्ताहरुलाई नगद भुक्तानी सेवा शुरुवात गर्ने भएको छ ।
बराह सहकारीले बिहिबार बराह किचनमा पत्रकार सम्मेलन गर्दे आफ्नो कारोबारलाई चुस्त दुरुस्त राख्दै सदस्यहरुलाई वर्गीकरणको आधारमा बैशाख १५ गतेदेखि नगद भुक्तानी गर्ने जानकारी दिएको हो । बराह सहकारीका अध्यक्ष मानबहादुर विश्वकर्माले ज्येष्ठ नागरिक, स्वास्थ्य उपचार, शिक्षा, फरक क्षमता भएका व्यक्तित्वहरुलाई प्राथमिकतामा राखेर बैशाख १५ गतेदेखि नगद भुक्तानी दिइने बताए ।
अध्यक्ष विश्वकर्माका अनुसार ठुलो रकम भुक्तानी गर्न नसकिने भएकोले वचतकर्ताहरुको वर्गीकरण गरेर थोरै साँवा र थोरै ब्याज भुक्तानी गरिनेछ । यसको लागि तालिका बनाएर एक दिनमा कति जनालाई, कति नगद भुक्तानी गर्ने भनेर जानकारी दिइने पनि उनले बताए । ‘ठुलो नगद भुक्तानी परिस्थिति सहज हुनासाथ गछौ, अहिलेलाई तालिका बनाएर थोरै साँवा र ब्याज भुक्तानी गर्नेछौ,’उनले भने,‘अहिलेको असहज परिस्थितिबारे हाम्रा वचतकर्ता, सेयर सदस्य ज्युहरुले बुझिदिएर सहयोग गर्नुहुनेछ भन्ने अनुरोध पनि गछौ ।’
अध्यक्ष विश्वकर्माले कोरोना भाइरस पछिको विश्व बजारको अवस्थासँगै देशमा हाल देखा परेको बित्तिय असन्तुलन, तरलता, अभावले प्रभावित बनाएको बताए । कोरोना महामारीको असरले गर्दा ऋण लगानी उठ्न नसक्नु, वचतकर्ताहरुबाट निक्षेप संकलन हुनुभन्दा भुक्तानी बढी हुन थाल्नुलगायत कारणले असहज भएको उनको भनाई छ । ‘ऋणको भाका नाघेर असुल गर्ने प्रक्रिया शुरु गरेका छौ, तर जति प्रभावकारीरुपमा असुल हुनुपर्ने थियो, त्यो हुन सकेन,’अध्यक्ष विश्वकर्माले भने,‘कसैको कोभिडले मृत्यु भएको छ, कोही सम्पर्कविहिन भएका छन् । हामीले असुलको प्रक्रिया शुरु गरिसकेका छौ । हाम्रा सेयर सदस्य, वचतकर्ताहरुको विश्वासलाई हामी टुट्न दिने छैनौं ।’
बराहका कर्मचारीहरुलाई धेरै लगानी गरिएको सञ्चारकर्मीको प्रश्नको जवाफमा अध्यक्ष विश्वकर्माले कर्मचारी भएर नभै सहकारीको सदस्य भएका कर्मचारीहरुलाई ऐन, नियम र प्रक्रिया पुरा गरेर नै ऋण लगानी गरिएको प्रष्टीकरण दिए । साथै, जथाभावी लगानी गरिएकोले ऋण लगानी उठ्न नसकेको हो ? भन्ने प्रश्नमा पनि उनले सहकारीको ऐन, नियम र प्रक्रिया विपरीत लगानी नगरिएको दाबी गरे ।
गोर्खाको भवन १ अर्ब १ करोडमा खरिद
सञ्चारकर्मीहरुले धरान ८ स्थित गोर्खा डिपार्टमेन्ट स्टोरको व्यापारिक भवन खरिद गरिएको बिषयमा पनि प्रश्न उठाएका थिए । सञ्चारकर्मी निमा पोङ्सुवाले २९ करोड वास्तविक मुल्य भएपनि १ अर्ब बढीमा खरिद गरेको भन्ने चर्चा सुनिएको र सहकारीको पैसा उक्त भवनमा लगानी भएर आर्थिक संकट भएको हो ? भन्ने प्रश्न गरेका थिए ।
यो प्रश्नको जवाफ दिदै बराह ग्रुप अफ कम्पनीका अध्यक्ष शिव लामिछानेले उक्त भवन सहकारीले खरिद नगरेको नभै बराह ग्रुप कम्पनीले खरिद गरेको प्रष्ट पारे । साथै, उनले विभिन्न अफवाह र भ्रम फैलिरहेको भन्दै सहकारीको नियमभन्दा बाहिर गएर लगानी गर्न नपाइने जिकिर गरे । उनले भने,‘त्यो भवनको वास्तविक मुल्य १ अर्ब १ करोड हो, हामीले त्यतिमै खरिद गरेको हो । त्यो भवन सहकारीले किनेको पनि होइन, बराह ग्रुपले खरिद गरेको हो ।’
बराह ग्रुपका अध्यक्ष लामिछानेले विगत ६ महिनादेखि नै वचतकर्ताहरुलाई सहजरुपमा भुक्तानी गर्ने प्रक्रिया आफुहरुले शुरु गरेपनि विविध कारणले सहज नभएको बताए । तर, अब बैशाख १५ गते भने वचतकर्ताहरुलाई वर्गीकरण गरेर भुक्तानी गर्न समस्या नहुने उनले बताए । चैत २२ गते भुक्तानी दिने कुरा संस्थागत हुन नसकेको भन्दै लामिछानेले बैशाख १५ गते भुक्तानी गर्ने कुरा भने संस्थागत धारणा नै भएको पनि प्रष्ट पारे ।
